JUMUIYA YA JESHI LA AKIBA TEMEKE YAZINDULIWA

Posted on: June 14th, 2022

Mkuu wa wilaya ya Temeke Mheshimiwa Jokate Mwegelo akiambatana na kamati ya ulinzi na usalama  amezindua Jumuiya ya jeshi la akiba Temeke ijulikanayo kama (JELAATE) leo Juni 14, 2022 katika eneo la Mwembe Yanga lililopo Temeke Dar es salaam.

Jumuiya hiyo yenye jumla ya Wanachama 150, inajumuisha wahitimu wa mafunzo ya mgambo wa kuanzia mwaka 1998 mpaka hivi sasa ,imeanzishwa kwa madhumuni ya kuanzisha kampuni ya ulinzi itayowasaidia wahitimu  hao wa mafunzo ya Mgambo kujiajiri na kuajiriwa katika makampuni ili waweze kujikwamua kiuchumi na kujiendeleza kupitia miradi mbali mbali ya uzalishaji mali ikiwemo ujenzi, ulinzi, ufugaji, bustani za mboga mboga pamoja na kushiriki katika shuhuli za Serikali.

Akizungumza mara baada ya uzinduzi huo Mhe. Jokate amewapongeza vijana hao kwa kujenga historia ambayo amesisitiza lazima ilindwe huku akiahidi kuwasaidia ili waweze kuyafikia malengo yao.

Katika hatua nyingine mkuu huyo wa wilaya amewaasa vijana hao kujipanga na kushirikiana kwa pamoja, huku akisema kuwa daraja la jeshi la akiba katika Jamii ni la juu sana kwa sababu wamejengwa katika uzalendo uliotukuka, nidhamu, uvumilivu na weledi wa kufanya kazi kwa bidii na kujitoa.

"Sisi ndio walezi wenu ,hatuwezi kuwaacha kwa sababu mmetengeneza historia mpya na mtafika mbali mkiendelea na roho hii, tutaongea na watu wa BRELA wawasaidie kukamilisha usajili wenu na kuwashauri namna kuendesha kampuni, kwani uaminifu, uzalendo wenu kwetu sisi ni mkubwa zaidi.Tuko tayari kuwasaidia,naamini mkiendelea na hii 'spirit' mtafika mbali". Alisema Mhe. Jokate

Sambamba na hayo Mhe. Jokate amewataka kuwa wamoja na kuacha kuvurugana, kugombana mara baada ya kuanza kupata mafanikio kwa sababu ya kuanzisha migogoro, fitina, umbea na majungu, vitu ambavyo havina maslahi ya maendeleo katika Jumuiya hiyo.

"Sisi tupo na nyinyi bega kwa bega mpaka mtapoyafikia malengo yenu,kwa sababu ninyi ni zao la ofisi ya mkuu wa Wilaya,mafanikio yenu ndio mafanikio yetu, hivyo mkituhakikishia kuwa hamtakuwa na migogoro sisi tutawabeba na tupo tayari kuwapa ushirikiano mkubwa ili muweze kusimama imara". Aliongeza Mhe. Jokate.