JWTZ NA JESHI LA UKOMBOZI LA WATU WA CHINA LAGUSA AFYA ZA WANATEMEKE

Posted on: July 19th, 2024

Na: Joanita Joseph - TMC Habari

Julai 19, 2024 Jeshi la Ulinzi la Wananchi wa Tanzania (JWTZ) kwa kushirikiana na Madaktari kutoka Jeshi la Ukombozi la Watu wa China wameendesha zoezi la utoaji huduma bure za uchunguzi wa kiafya na matibabu ikiwemo za kibingwa kwa wakazi wa Temeke ikiwa ni sehemu ya kuadhimisha miaka 60 tangu kuanzishwa kwa JWTZ na miaka 60 ya ushirikiano na Jeshi la China.

Akizungumza katika eneo hilo Daktari Esther John Matoro, Mganga mfawidhi wa kituo cha Afya Mbagala Round table amesema

"Kipekee tunawashukuru sana JWTZ na Jeshi la China, huduma walizozitoa leo ni nzuri na wananchi wamefurahia na wametamani wangekaa zaidi kwakuwa huduma zinahitajika" alisema Dr. Esther

Zoezi hilo limefanyika katika Kituo cha Afya Mbagala Round Table ambapo takribani Wananchi 156 wamepata huduma huku wengine wakishauriwa kuhudhuria kituoni na Bandari gate Namba 02 ambapo huduma zinaendelea kwa msaada zaidi.

Ikumbukwe kuwa mapema Julai 16, 2024 Meli ya hospitali ya 'Ark peace' iliwasili Nchini (Bandari ya Dar es Salaam) ikiwa na Madaktari Bingwa pamoja na Vifaa vyote tayari kufanya uchunguzi wa kiafya kwa Watanzania kwa siku 5 kuanzia Julai 17 hadi Julai 22, 2024.