KAMANDA NG'AZI AANZA NA STENDI YA KIJICHI TEMEKE

Posted on: November 8th, 2022

Na; Nassoro Rashid

TMC Habari

Leo Novemba 8, 2022 kamanda mkuu wa kikosi cha usalama barabarani Tanzania Ramadhani Ng'anzi amefanya ziara katika stendi ya mabasi yaendayo kusini na mikoa ya jirani nje ya Dar es salaam iliyopo Kijichi wilaya ya Temeke kuona maendeleo ya stendi hiyo.

Akizungumza mara baada ya ziara hiyo kamanda Ng'azi amesema baada ya kukabidhiwa ofisi hapo jana ameona leo atoke nje ya ofisi kwa kufanya ziara Temeke hususani katika stendi hiyo na kufanikiwa kuona mradi huo umekamilika kwa kiasi kikubwa huku kukiwepo matengenezo kwa baadhi ya changamoto ndogo ndogo zilizopo.

"Changamoto zilizopo zinafanyiwa ufumbuzi kwani mradi utakapokamilika utakidhi matakwa ya usafirishaji bora, hivyo kwa sasa hatuna cha kupoteza kwani Jeshi la polisi lipo tayari kuona mradi huu unafanikiwa, na tutahakikisha magari yote yanafika Kijichi". Alisema kamanda Ng'azi

Kadhalika kamanda Ng'azi ametoa rai kwa mawakala wa mabasi waliopo Stendi ya Kijichi kufanya kazi zao kwa uadilifu, uaminifu pamoja na nidhamu na haki kwa kila mmoja na hawatakuwa tayari kuona yoyote anavunja sheria na utaratibu wa usalama barabarani.

"Lengo letu hasa kufanya barabara zetu zipitike kwa usalama kuanzia Januari mosi mpaka Disemba 31 bila ya matukio yoyote ya ajali kwa wasafiri wote, pia ziwawezeshe wananchi kunufaika na kufaidika kwa kusafirisha mazao yao na bidhaa zingine". Alisema Kamanda Ng'azi

Sambamba na hayo pia kamanda Ng'azi amesema yupo tayari kushirikiana na Mkuu wa Wilaya wa Temeke Mhe. Jokate pamoja na Mkurugenzi Mabelya kwani wote wana majukumu makubwa ya kumwakilisha Rais wa Jamhuri ya Muungano wa Tanzania Mhe. Samia Suluhu Hassan.

Hata hivyo kamanda Ng'azi amechukua majukumu hayo mara baada ya mkuu wa Jeshi la Polisi nchini kufanya mabadiliko madogo ya kumuhamisha kutoka kamanda mkuu wa mkoa wa Mwanza na kuwa mkuu wa kikosi cha usalama barabarani Tanzania.