KAMATI YA KUDUMU YA BUNGE (TAMISEMI) YAFIKA TEMEKE, YARIDHISHWA NA UTEKELEZAJI WA MIRADI YA MAENDELEO

Posted on: November 11th, 2024

Leo Novemba 10, 2024 Kamati ya kudumu ya Bunge ya Tawala za Mikoa na Serikali za Mitaa (TAMISEMI) imefanya ziara katika Manispaa ya Temeke kwa lengo la kukagua miradi mbalimbali ya maendeleo inayotekelezwa ndani ya Manispaa hii ikiwa ni muendelezo wa ziara yao ya Ukaguzi wa Miradi ya Maendeleo kwa Mkoa wa Dar es salaam.

Akizungumza katika ziara hiyo Mhe. Justin Lazaro Nyamoga, Mbunge wa Jimbo la Kilolo amewapongeza Manispaa ya Temeke juu ya kazi kubwa waliyoifanya kwenye utekelezaji wa miradi ya maendeleo.

‘’Miradi tuliotembelea hapa Temeke kwa kweli ni mizuri na tunawapongeza sana tena sana kwa kazi kubwa mliyoifanya tumeona kwa jinsi gani pesa za ndani na nje zimetumika kwa ustadi wa hali ya juu, rai yetu sisi kama kamati endelezeni kwa miradi mingine’’. Alisema Mhe. Justin Lazaro.

Mhe. Nyamoga ameongeza kuwa ni vema kuweka ulinzi wa kuhifadhi mazingira katika maeneo ambayo yapo wazi na kukarabati kwa ubunifu ili yaweze kuleta manufaa kwa wananchi na Manispaa kwa ujumla.

‘’Tunashauri lile eneo la chang’ombe katika mradi huu wa (DMDP) muweze kuona ni kwa namna gani munaweza kutengeneza kitu cha ubunifu ambao utaleta faida ndani manispaa na mkoa wa Dar-es-salaam’’.Alisema Mhe. Nyamoga

Aidha Mhe.Dorothy Kilave Mbunge wa Jimbo la Temeke alipata nafasi ya kuzungumza mbele ya kamati ya kudumu ya Bunge,Pamoja na viongozi mbalimbali amewashukuru kwa kurudhishwa na utekelezaji wa miradi hiyo na kuahidi wataendeleza muendelezo mzuri kushirikiana na Mstahiki Meya,Madiwani,Mkuruenzi Pamoja na Menejimenti kwa ujumla.

Kwa upande wake Ndg. Jomaary Satura Mkurugenzi wa Manispaa ya Temeke amesema katika Mradi wa uendelezaji wa Jiji Wa Dar es salaam Awamu ya pili DMDP phase 2 )Temeke inakuwa safi kwa kutenga bajeti kwa ajili ya utengenezaji madampo makubwa matatu na kutekeleza miradi mingine.

Miongoni mwa miradi iliyotembelewa leo ni pamoja na ujenzi wa Ghorofa 6 Hospitali ya Mbagala rangi tatu, ujenzi wa shule mpya ya Sekondari Mangaya, Mbagala, Pamoja na bweni na bwalo shule ya Sekondari Kibasila.