KAMATI YA LISHE WILAYA YAKETI KIKAO CHA ROBO YA KWANZA MWAKA WA FEDHA 2025/2026

Posted on: November 25th, 2025

Na: Joanita Joseph, TMC Habari

Kamati ya Lishe ya Wilaya ya Temeke leo Novemba 25, 2025 imeketi Kikao cha kawaida ambacho ni mahsusi kwa ajili ya kujadili Taarifa ya Utekelezaji wa Mkataba wa Lishe kwa Robo ya kwanza (Julai-Septemba) Mwaka wa fedha 2025/2026.

Wajumbe wa kamati hiyo wamewasilisha Taarifa zao za utekelezaji kupitia Idara na Vitengo vyao ikiwemo mafanikio yaliyofikiwa pamoja na changamoto mbalimbali ili ziweze kujadiliwa na kutafuta namna sahihi ya kutatuliwa na hatimaye kufikia malengo.

Akizungumza katika Kikao hicho Ndg. Yahya Madenge Kaimu Mkurugenzi Manispaa ya Temeke na Mwenyekiti wa Kikao hicho mara baada ya kupokea taarifa amesisitiza Watoto kuendelea kupatiwa Chakula Mashuleni ili kujiepusha na madhara yatokanayo na ukosefu wa lishe lakini kuongeza ufanisi wa kujifunza wanapokuwa katika Masomo yao hatimaye kukuza Ufaulu.

"Chakula mashuleni si tu ni lishe pekee, bali ni hamasa kwa mtoto hata kuhudhuria shuleni na kujifunza, tuendelee kuhamasisha wazazi kuchangia chakula mashuleni ili watoto wale"  alisema Ndg. Madenge.

Kwa upande wake Bi. Happy Nkunda, Afisa lishe Manispaa ya Temeke amesema Idara ya Afya imekuwa ikisimamia kikamilifu Utekelezaji wa Mkataba wa Lishe ikiwemo kuwapatia wajawazito vidonge vya madini ya chuma na Asidi ya foliki (feFo) ili kuzuia mtoto kuzaliwa na ulemavu, kuendelea na upimaji wa hali ya lishe, matibabu na elimu ya lishe katika Vituo vya kutolea huduma za Afya, pamoja na kuendelea kuhamasishana juu ya suala la ulaji Mashuleni.

Hata hivyo Kamati imeridhishwa na utekelezaji wa malengo kupitia Idara na vitengo husika na kuwekeana mikakati bora zaidi ya utendaji katika kuhakikisha hali ya lishe inazidi kuimarika wilayani Temeke.