Kamati ya siasa Yafurahishwa na Utekelezaji wa ilani Temeke.

Posted on: May 30th, 2019

Kamati  ya siasa  mkoa wa Dar es Salaam ikisikiliza maelezo kutoka kwa Mganga Mkuu wa  manispaa ya Temeke  kuhusu ujenzi  wa Jengo la ghrorofa mbili linalojengwa katika zahanati ya Yombo vituka.Jengo hili  linajengwa kwa mapato ya ndani, litakapokamilika zahanati hiyo inatarajiwa kupandishwa hadhi na kuwa kituo cha afya

Kamati ya Siasa Mkoa wa Dar es Salaam ikisikiliza maelezo kutoka kwa mkandarasi  mshauri  msaidizi  kuhusu mradi wa ujenzi wa barabara  katika kata ya Yombo Vituka.

Jengo la ghrorofa mbili linalojengwa katika zahanati ya Yombo vituka linavyoonekana kwa nje.

Kamati ya siasa ya mkoa wa Dar es Salaam wakikagua  ujenzi wa mabweni ya wanafunzi wasioona katika shule ya msingi Toangoma iliyopo kata ya Toangoma  Manispaa ya Temeke.

Kamati ya siasa ya mkoa wa Dar es Salaam wakikagua  ujenzi wa vyoo katika shule ya msingi Toangoma iliyopo kata ya Toangoma  Manispaa ya Temeke.

..................HABARI KAMILI...............

Kamati ya siasa ya Chama cha Mapinduzi mkoa wa Dar es Salaam imekiri kufurahishwa na utekelezaji wa miradi ya maendeleo katika Manispaa ya Temeke.Hayo yamesemwa  na Mwenyekiti wa kamati hiyo bibi Kate Silvia Kamba mara baada ya kumaliza ziara  jana majira ya saa 11 jioni.

Akizungumza baada ya kutembelea na kukagua miradi ya elimu,afya na barabara  bibi Kate  Kamba amesema ''Katika ziara yetu leo tumetembelea miradi mbalimbali,tumeona ujenzi wa kituo cha afya ambacho ni cha aina yake.tumeona ujenzi wa miundombinu ya maji, mabweni, madarasa, vyoo. Vilevile tumeona ujenzi wa barabara.Tulipita mwaka jana,lakini mwaka huu tumeona mambo makubwa,miradi imejengwa kwa viwango.Kwa kweli inafurahisha.Si hilo tu, tulipopita mwaka jana, kulikuwa na changamoto kubwa sana ya miundombinu,tulizamazama sana.Mwaka huu mambo ni tofauti,tumepita tunateleza  kwenye lami,lami imara ambayo tumeambiwa itachukua miaka 45.Hii inamaanisha kwamba ilani yetu haipo tu kwenye maandishi,bali ipo kwenye utekelezaji.Tuliyowaahidi wananchi tunayatekeleza kwa vitendo''.

Naye katibu wa CCM mkoa wa Dar es Salaam ndugu Zakaria Mwansasu  amewashukuru wananchi pamoja na watendaji wa manispaa. Hapa Mwansasu anasema''Tunawashukuru wananchi ambao ndio walipa kodi,kwani ndio waliotuwezesha, na sisi chama cha mapinduzi tuko hapa tunasimamia kuhakikisha kwamba kodi zao zinatumika sawasawa na jinsi ambavyo wametupa dhamana.Tunashukuru kwamba hata watendaji wetu wa halmashauri  ambao tumewapa dhamana ya kusimamia hayo,nao wanajitahidi sana kusimamia ,kwamba fedha zile ambazo zinatolewa,zinatumika ipasavyo.Kwa mara ya kwanza kuanzia tuanze kukagua miradi  hatujaona jengo lenye nyufa.Kwa mantiki hii 'ina maana kwamba force account' inatumika vizuri.Na ni kwa sababu linasimamiwa vizuri na watendaji.Ni jambo ambalo linafurahisha sana.Kituo hiki cha afya mpaka kitakapokamilika kitatumia sh.Bilioni 2 na milioni 125. Mpaka sasa imeshatumika sh. Bilioni 1 ,lakini kwa jinsi ilivyo ,unaona kabisa kwamba  fedha zilizotumika zimetumika sawasawa''.

Kamati ya siasa ya mkoa imetembelea miradi mbalimbali katika wilaya ya Temeke.Miradi hiyo ni ujenzi wa vyumba vinne vya madarasa katika shule ya sekondari ya Kijichi iliyopo katika kata ya Kijichi,,Mradi wa ujenzi wa mabweni mawili ya wasioona na vyumba vitatu vya madarasa pamoja na matundu 6 ya vyoo katika shule ya msingi Toangoma,iliyopo katika kata ya Toangoma.Ujenzi wa shule ya msingi Marten Lumbanga iliyopo kata ya Kilungule. Ujenzi wa Zahanati ya Yombo vituka iliyopo katika kata ya Yombo Vituka.Mradi wa ujenzi wa barabara za 'Dar es Salaam Metropolitant Development Project' (DMDP) katika kata ya Yombo Vituka, pamoja na ujenzi wa miundombinu ya maji  katika kata ya Charambe.

..............MWISHO...............