Kamati za Mazingira Mkoa wa Dar es Salaam Zakutana Kujadili Changamoto za Kimazingira.

Posted on: March 30th, 2021

Wajumbe wa kamati za mazingira kutoka Manispaa zote za mkoa wa Dar es Salaam Wakiwasilisha taarifa za maeneo waliyotembelea.

Baada ya asasi isiyo ya kiserikali ya Lawyers Environment Action Team(LEAT) na kamati za mazingira za wilaya,kufanya ziara katika wilaya zote za mkoa wa Dar es Salaam ,kamati hizo zimekutana pamoja  Machi 12,2021 katika ukumbi wa hoteli ya 'Rombo Green View'huku waandaaji wa mkutano wakiwa ni LEAT.

Katika mkutano huo kila wilaya iliwasilisha taarifa ya ziara yake,ambapo taarifa hizo zilibainisha changamoto za kimazingira walizokutana nazo katika maeneo waliyotembelea, hatua zilizochukuliwa katika kuzitatua,na  mapendekezo yake juu ya namna bora ya kuondoa changamoto hizo.

Baada ya taarifa hizo kuwasilishwa,Afisa wa LEAT wakili Baraka Thomas,alikiri kuridhishwa na namna taarifa za kamati hizo zilivyowasilisha taarifa zake,ambapo zimeonyesha changamoto,na namna ambavyo Manispaa zinapambana kuzitatua.

"Mmefanya kazi nzuri,mmeonyesha kazi zilizofanyika baada ya ziara,vile vile mmeonyesha jinsi jamii ilivyoshirikishwa.Hilo ni jambo muhimu sana.Kwamba  tunapokutana hapa,hatuishii kukutana tu,lakini baada ya hapo kuna kinachofanyika.Sisi tutaendelea kushirikiana na Manispaa zote,kama ambavyo tumekuwa tukifanya,lakini ni jambo jema sana,pale unapoona mhusika anachukua hatua kutatua changamoto inayomkabili kabla mtu mwingine wa pembeni kufanya hivyo"Alisisitiza Wakili Thomas.

Mkoa wa Dar es Salaam ni moja wapo ya mikoa ambayo ina changamoto  za kimazingira,ambapo kwa sehemu kubwa  changamoto hizo zinatokana na shughuli za kibinadamu kama ujenzi usiozingatia mipango miji, Biashara ndogondogo katika maeneo yasiyo rasmi,jambo linalosababisha uzalishaji mwingi wa taka,unaoambatana na utupaji  holela wa taka,uchimbaji  holela wa mchanga na utiririshaji wa maji taka kutoka kwenye makazi ya watu kwenda kweye mito.

LEAT kama mdau muhimu wa mazingira,imekuwa mstari katika kuhakikisha kwamba inawawezesha wakazi  wa Mkoa huo kuelewa na kutimiza wajibu wao ili kuishi katika mazingira safi na salama.