Katibu Mkuu TAMISEMI afurahishwa na mpango mkakati wa Temeke kunusuru wanafunzi 5,808

Posted on: January 3rd, 2020

Wanafunzi 701,038 sawa na asilimia 92.27 waliofanya mtihani wa darasa la saba mwaka 2019 wamechaguliwa kuendelea na kidato cha kwanza mwaka 2020

Kati ya waliochaguliwa kujiunga na kidato cha kwanza wavulana ni 335,513 na wasichana ni 36,525, Katika mkoa wa Dar es salaam wanafunzi waliokosa kuchaguliwa ni 5,808 sawa na 10% ya waliochaguliwa.

Akizungumza na Mkurugenzi wa manispaa ya Temeke pamoja na baadhi ya wakuu wa idara, Katibu Mkuu Eng Joseph Nyamuhanga alimuagiza Mkurugenzi Mwakabibi kuhakikisha wanafunzi wote waliochaguliwa ,sambamba na wale waliofaulu lakini hawakupangiwa shule kutokana na uhaba wa vyumba vya madarasa ,wote kwa pamoja waanze shule siku ya jumatatu tarehe 06/01/2020.

“Natambua shule zitafunguliwa tarehe 06 siku ya jumatatu,hivyo basi ninakuagiza utafute namna ya kuhakikisha wanafunzi wote katika Manispaa yako wanakwenda kuanza masomo siku hiyo”Alisema Eng Nyamuhanga

 Sitaki kusikia kuwa wapo waliobaki nyumbani kwasababu ya changamoto ya madawati wala vyumba vya madarasa, wote waanze pamoja, tafuta namna ya kuwasaidia, tutavumilia msongamano kwa mwezi mmoja tu ila ifikapo mwezi februari naimani ujenzi utakuwa umekamilika na wanafunzi watakaa madarasani kwa uwiano unaotakiwa.Alisisitiza zaidi.

Nae Mkurugenzi Mwakabibi amemtoa hofu Katibu Mkuu kwamba wanafunzi wote 5,808 waliokosa nafasi wataingia darasani siku ya jumatatu kama ilivyoagizwa na kumuhakikishia mpaka ifikapo februari 10 madarasa yote 120 yatakuwa yamekamilika na hakuna mwanafunzi atakae soma kwa adha tena

Mhe.Katibu Mkuu ninakuhakikishia Temeke tumejipanga, fedha za ujenzi tunazo na tutajenga usiku na mchana mpaka kufikia tarehe 10/02/2020 kila mwanafunzi aliyefaulu na kuchaguliwa atakuwa anasoma katika jengo zuri sambamba na kukalia dawati.

“Tumesimamisha kila kitu ili watoto wetu wasome, kusoma ni haki ya msingi ya kila mtoto hivyo  kwa kipindi hiki cha mwezi mmoja  tutaongeza wanafunzi katika  baadhi ya shule lakini baada ya hapo kila mwanafunzi atapangiwa wapi akasome “.Alisema Mwakabibi

 Zira ya Katibu Mkuu TAMISEMI ni moja kati ya ziara nyingi anazofanya katika kuhakikisha utendaji kazi unafanyika kwa weledi na kukumbushana wajibu wa kufanya kazi kwa bidii kwa ustawi wa Taif, Katibu Mkuu  alipata wasaha wakutembelea shule ya sekondari Kijichi nakujionea ujenzi wa vyumba vya madarasa na kuridhishwa na namna maandalizi yanavyoendelea ya kupokea wanafunzi wa kidato cha kwanza.