KATIBU TAWALA TEMEKE AITAKA JAMII KUJITOKEZA KATIKA KAMPENIYA UGAWAJI WA KINGATIBA KUDHIBITIUGONJWA WA MATENDE NA MABUSHA (NGIRIMAJI)

Posted on: November 18th, 2022

Na; Nassoro Rashid

       TMC Habari

Novemba 18, 2022 katibu tawala wilaya ya Temeke  Bi Bupe Mwakibete ameongoza kikao cha uhamasishaji ngazi ya Wilaya kwa niaba ya Mkuu wa Wilaya, kujadili mpango wa Taifa wa kudhibiti magonjwa yaliyokuwa hayapewi kipaumbele, hususani ugonjwa wa Matende na Mabusha (Ngirimaji) kilichofanyika katika ukumbi  wa idara ya Afya manispaa ya Temeke.

Akizungumza mara baada ya kikao hicho katibu tawala Bupe amesema anamshukuru sana Mhe. Rais Samia Suluhu Hassan kwa kutoa fedha kwa ajili ya kupata dawa hizo zitakazowafikia Wananchi wote ili waweze kuendelea kuwa na afya njema.

" Kwa hiyo tunawasihi Wananchi waunge mkono juhudi za Mheshimiwa Rais kuhakikisha Wananchi wote wanakuwa na afya njema ili waweze kushiriki vizuri katika shughuli za kiuchumi". Alisema Katibu Tawala Bupe 

Zoezi litaanza Novemba 21 mpaka 25 mwaka huu, kwa niaba ya mkuu wa Wilaya tunatoa wito kwa Wananchi wote wa wilaya ya Temeke kujitokeza kupata kingatiba hizi, ambazo zitakwenda kuwasaidia kujikinga dhidi ya magonjwa ya Mabusha pamoja na Matende." Aliongeza Katibu Tawala Bupe.

Kwa upande wake mganga mkuu wa wilaya Dkt. Irene Haule amesema wanategemea kumezesha dawa  Wanawake,Wanaume na Watoto,ambapo jumla yao wote ni takribani 1,567,267,wenye umri kuanzia miaka 5 na kuendelea,isipokuwa  Wajawazito na Wamama Wanaonyonyesha hawatahusika katika zoezi hilo.

Magonjwa ya  Matende na Mabusha yanasababishwa na mbu wa aina nne,mtu yeyote bila kujali jinsia yake,anaweza kupata.Yanaathiri uchumi wa  Wanajamii, yanaleta ulemavu wa kudumu na unyanyapaa, yanapunguza nguvu ya uzalishaji pamoja na kukosesha furaha, hivyo upatikanaji wa kingatiba hiyo utasaidia Wananchi kuepukana na athari hizi.