KERO YA KUJAA MAJI SOKO LA VETENARI YATATULIWA

Posted on: January 27th, 2022

  Mkuu wa wilaya ya Temeke Mheshimiwa Jokate Mwegelo siku ya  Januari 26, 2022 ameongozana na uongozi wa Machinga Taifa na Mkoa Dar es Salaam kufanya ziara ya ukaguzi wa miundombinu ya visima, mitaro na makaro ya maji katika soko la Temeke Vetenari.

Katika ziara hiyo viongozi hao wameshuhudia namna  makaro na mifereji ya maji inavyosaidia Wafanyabiashara ndogondogo kwa kutatua kero ya kujaa maji katika maeneo hayo ya soko ambapo kabla ya ujenzi huo kulikuwa na adha kubwa ya kusimama kwa biashara kipindi cha mvua kutokana na kujaa maji mengi eneo hilo.

Akizungumza mara baada ya ukaguzi huo Mkuu wa Wilaya amesema manispaa na Wilaya wameendelea kumuunga mkono  Mheshimiwa Rais Samia Suluhu Hassan kwa vitendo kwa kutumia Shilingi 199,000,000 ya mapato ya ndani kujenga miundombinu hiyo ili kuboresha mazingira rafiki ya wafanyabiashara katika masoko.

"Niendelee kuwaahidi, kwa muongozo tuliopewa na Mhe. Rais, Mkuu wa Mkoa, katibu tawala Mkoa, kuwa tutaendelea kushirikiana katika kuboresha masoko na kutenga zaidi maeneo ya kuwapeleka Machinga wanapostahili wao kuwekwa". Alisema Mhe. Jokate

Sambamba na hayo Mkuu wa Wilaya ametoa wito kwa watendaji kutekeleza jukumu la kuhakikisha Machinga wanabaki katika maeneo waliopangiwa na kusimamia masoko kuhakikisha miundombinu hiyo inalindwa.

Naye Makamu Mwenyekiti wa Machinga Taifa Ndugu Steven Lusinde na Mwenyekiti Mkoa Ndugu Yusuf Namoto wamesema leo wameamua kuungana na Mhe. Jokate kuweza kutekeleza agizo la Mhe. Rais juu ya uboreshaji wa miundombinu katika masoko ambapo wameonesha kufurahishwa na hali waliyoikuta soko la Vetenari huku wakiwataka Machinga kuendelea kutunza miundombinu hiyo na kuwataka  kubaki katika maeneo waliyohamishiwa.

Kadhalika, Wafanyabiashara wa soko hilo wamefurahishwa sana na ujenzi wa miundombinu hiyo kwa kuwasiaida sana kuondoa changamoto waliyokuwa wanakutana nayo kipindi cha mvua na uwepo wa makaro ya maji imekuwa suluhu kwa wauzaji vyakula (Mamalishe) kupata sehemu ya kumwagia maji machafu.

Ikumbukwe ujenzi huu wa miundombinu umetokana na kampeni ya uboreshaji wa mazingira ya ya Machinga katika masoko waliyohamishiwa kuendesha biashara zao.

Ikumbukwe ujenzi huu wa miundombinu umetokana na kampeni ya uboreshaji wa mazingira ya Machinga katika Masoko waliyohamishiwa kuendesha biashara zao mara baada ya kuhama kutoka barabarani ili kuwasaidia kurahisisha shuhuli zao za kila siku.