KIGOMA YAWEKA KAMBI SIKU 3 KUJIFUNZA NAMNA TEMEKE INAVYOTEKELEZA UTOAJI WA MIKOPO YA 10%

Posted on: November 25th, 2020

Mkoa wa Kigoma kupitia wataalam wake umeweka kambi ya siku 3 kuanzia leo tarehe 25/11/2020 katika Manispaa ya Temeke kwa lengo la kujifunza namna Temeke ilivyofanikiwa kutekeleza agizo la Serikali ya awamu ya tano chini ya Rais Mhe. Dkt John Pombe Magufuli katika utoaji wa mikopo ya 10% kwa wanawake, vijana na watu wenye ulemavu.

Wataalam hao wamezuru katika Manispaa ya Temeke wakiongozwa na kaimu Katibu Tawala wa Mkoa huo Dkt Vedast M. Makota ambaye anamwakilisha katibu Tawala wa Mkoa wa Kigoma Ndg Rashid Mchata, viongozi wengine alioambatana nao ngazi ya Halmashauri ni Mkurugenzi wa Halmashari ya Kasuru,mwakilishi wa Mkurugrenzi Halmashauri ya Kibondo, vilevile Sekretarieti ya Mkoa  ambao ni Afisa biashara wa Mkoa, Afisa maendeleo wa Mkoa pamoja na baadhi ya wajasiriamali wa mkoa huo.

Akiongea wakati wa ziara ya kutembelea baadhi ya vikundi vya wajasiriamali ambao wamewezeshwa na Manispaa ya Temeke,Kaimu Katibu tawala wa Mkoa wa Kigoma amesema amevutiwa kuona viwanda vya kutengeneza bidhaa za Ngozi vikiendeshawa na vijana waliowezeshwa na Manispaa, viwanda vya ushonaji nguo, mradi wa usafishaji (usafi wa mazingira) ambao wamepatiwa gari kubwa la kuzolea taka ukisimamiwa na wanawake.

Vilevile kiwanda cha kusindika karanga mradi ambao unasimamiwa na wananawake wajasiriamali waliowezeshwa na Manispaa kupitia mikopo ya 10%.

Aidha kwa kuwa Serikali imekuwa ikitilia mkazo suala la kuwainua wananchi kiuchumi, na kwa upande wa mkoa wa Kigoma suala la mikopo ya 10% ni ajenda ya kudumu, sasa ziara yao katika Manispaa ya Temeke inakwenda kuboresha Mkoa na Wilaya zake namna bora na zenye tija za utoaji wa mikopo hiyo.

Amesema “Kigoma imeona umuhimu wa kuja Temeke kujifunza baada ya kufuatilia na kuona Manispaa ya Temeke inafanya vizuri katika kutoa mikopa ya 10% kwa wanawake,vijana na Watu wenye ulemavu.”

Mkuu wa Idara ya maendeleo ya Jamii na Vijana Manispaa ya Temeke Bi Herieth Makombe akifafanua utoaji wa mikopo ya 10% mbele ya wageni hao amesema Manispaa ya Temeke imekuwa ikitekeleza mikopo hiyo tofauti kidogo na Halmashauri zingine nchini. Temeke imekuwa ikitoa vifaa vya uzalishaji na sio pesa, pesa inatolewa kwa sehemu ndogo sana ambayo ni tsh 100,000/= hadi 2,000,000/= tu.

Aidha kupitia utaratibu huo unawawezesha wanawake,vijana na watu wenye ulemavu kumiliki viwanda, kupata ajira na pia kurahisisha suala la marejesho kwa kuwa kama wanakikundi watashindwa kurejesha mikopo yao wananyang’anywa vifaa.

Sambamba na hilo Manispaa ya Temeke imejidhatiti kwa vitendo kuunga mkono juhudi za Serikali ya Tanzania za kufikia uchumi wa kati, ili kufikia uchumi huo lazima kuwekeza katika viwanda vikubwa, vya kati na vidogovidogo.

Baadhi ya matukio katika picha, wataalam kutoka Kigoma wakiwa katika miradi anuai inayotekelezwa Temeke.