KUELEKEA ZOEZI LA UBORESHAJI WA DAFTARI LA KUDUMU LA WAPIGA KURA, SIMITI AHITIMISHA MAFUNZO

Posted on: March 15th, 2025

Na: Joanita Joseph, TMC Habari

Afisa mwandikishaji Jimbo la Temeke na Mbagala Bi. Elizabeth Simiti leo Machi 15, 2025 amefunga Mafunzo kwa Waandikishaji wasaidizi na Waendesha Vifaa vya Bayometriki mahsusi kwa ajili ya Zoezi la Uboreshaji wa Daftari la kudumu la Wapiga Kura linalotarajiwa kuanza ifikapo Machi 17 hadi 23 Mkoani Dar es Salaam.

Akifunga Mafunzo hayo Bi.Simiti ametoa Shukrani kwa Watendaji wote kwa kazi nzuri waliyoifanya katika kipindi chote cha Mafunzo sambamba na Maelekezo kwa wahitimu wa mafunzo.

“Washiriki nawakumbusha kuzingatia maelezo mliyopewa wakati wa Mafunzo hasa katika suala la utendaji kazi, zoezi linaanza rasmi Jumatatu muda uliobaki utumike kusoma ili kujiweka sawa. Nawakumbusha kuwa waadilifu wakati wa zoezi na kuongeza umakini katika utunzaji wa vifaa vilivyonunuliwa kwa gharama kubwa”. Alisema Bi. Simiti

Aidha Bi. Simiti amesisitiza waandikishaji kuzingatia Muda wa kufunga na kufungua kituo sambamba na kutumia kauli/lugha nzuri wakati wa kutoa huduma kwa Wananchi.

Mafunzo hayo yaliyodumu kwa muda wa siku mbili yamekuwa maalum kwa ajili ya kuwanoa watendaji wa zoezi hilo na kuwaweka tayari kwenda kuhudumia Wakazi wa Temeke ili waweze kushiriki kikamilifu katika Uchaguzi Mkuu unaotarajiwa kufanyika Mwaka huu 2025.

“Kujiandikisha Kuwa Mpiga Kura ni Msingi wa Uchaguzi Bora”