MADIWANI 40 WA MVOMERO WATEMBELEA BANDA LA MANISPAA YA TEMEKE-MOROGORO

Posted on: August 6th, 2022

TMC habari-Morogoro

Maonesho ya wakulima maarufu Nanenane yanaendelea mkoani Morogoro ikiwa leo ni siku ya sita toka yalipoanza rasmi Agosti mosi mwaka huu.

Banda la Halmashauri ya manispaa ya Temeke limeendelea kuwa kivutio katika Maonesho hayo ambapo leo Agosti 6,2022 limetembelewa na waheshimiwa madiwani wa halmashauri ya wilaya ya Mvomero wakiongozwa na makamu mwenyekiti wa Halmashauri hiyo Mhe.Christopher Maarifa ambaye pia ni diwani wa kata ya Mangae wilayani Mvomero.

Wakiwa ndani ya banda hilo,madiwani hao wapatao 40 walipata fursa ya kujionea na kujifunza shughuli mbalimbali zinazofanywa na wajasiriamali na wakulima wanaotoka wilayani temeke.

"Nimekuwa nikisikia tu sifa kutoka kwa watu huko kuhusu mambo yanayofanywa hapa Temeke na mimi nikashauri tuje kupita hapa na kujifunza jinsi gani ya mikopo ile ya asilimia 10,na nimeona vitu vingine ambavyo sijawahi kuviona kama aina hii ya samaki mkunga".Aliongeza Mhe.Christopher.

Naye Mwenyekiti wa kamati ya Uchumi,Ujenzi na Mazingira wa Halmashauri hiyo Mhe.Jailos John Msigwa amesema kuwa wameweza kujifunza mambo mengi kupitia ziara yao hiyo na wataenda kufanyia kazi yale waliyojifunza.

Ziara hiyo ya madiwani ni muendelezo wa wageni mbalimbali wanoendelea kutembelea banda la manispaa ya temeke lililopo ndani ya viwanja vya Mwl.Nyerere maarufu kama Nanenane mkoani Morogoro ambapo elimu na mafunzo mbalimbali yanaendelea kutolewa juu ya kilimo bora,ufugaji,uvuvi na ujasiriamali ili kuhakikisha kilimo kinakuwa cha kibiashara ifikapo mwaka 2030.