Mahakama Inayotembea Yaanza Rasmi Kazi Temeke

Posted on: September 11th, 2019

Kwa mara ya kwanza Mahakama inayotembea imefungua shughuli zake za kimahakama katika Wilaya ya Temeke.

Mahakama hiyo itahudumu katika Wilaya ya Temeke kila siku ya jumatano katika eneo la stand   ya Buza na shughuli zake zitaanza saa 2:30 asubuhi.

Akizindua huduma hiyo Mkuu wa Wilaya ya Temeke Mh.Felix Lyaniva aliwasihi wananchi kuhakikisha wanajitokeza kwa wingi ili kuleta mashauri yao na kuhakiksha kesi zinapungua mahakamani.

Akifafanua ufanyaji kazi wa Mahakama hiyo inayotembea Hakimu mfawidhi wa Wilaya ya Temeke Bibi Suzan kihawa alisema kwamba Mahakama hiyo inafanya kazi kama ilivyo mahakama nyingine za Mwanzo na kuwasihi wananchi wajitokeze kwa wingi kwani mashauri yatakayofunguliwa katika mahakama hiyo yatashughulikiwa kwa siku 30 tu na haki itakuwa imepatikana.

Nae Hakimu mkazi wa Mahakama hiyo  aliwaambia wananchi kwamba madai yanayopokelewa na mahakama hiyo inayotembea ni kesi za mirathi,madai ya fedha pamoja na talaka.

"Hapa tunaanza na madai ya fedha,mirathi pamoja naatalaka ila kwa isku izjazo tutatanua wigo ili kuwasaidia wananchi katika mashauri yanayowakabili, cha msingi uwe na barua ya utambulisho  toka kwa mtendaji wako wa kata husika ili ufungue shauri lako" alisisitiza.

Uwepo wa mahakama hii utasaidia kupunguza adha mbalimbali za wananchi kutembea umbali mrefu kuifuata mahakama ya mwanzo ilipo na itapunguza msongamano wa kesi Mahakamani.

Tanzania ni nchi ya kwanza kwa nchi za Afrika kuwa na mahakama inayotembea,ambapo mpaka sasa ipo katika mikoa miwili.Mikoa hiyo ni Dar es Salaam na Mwanza.