MANISPAA YA TEMEKE YAKABIDHIWA VIFAA TIBA NA JWTZ

Posted on: August 29th, 2022

Katika kuadhimisha siku ya majeshi ya Afrika Mashariki,Jeshi la Wananchi wa Tanzania(JWTZ) limetoa msaada wa vifaa tiba na madawa pamoja na huduma za matibabu bure katika hospitali ya Mbagala Rangitatu.

Akizungumza leo Agosti 29,2022 katika hafla fupi ya makabidhiano ya vifaa hivyo na kufungua rasmi utoaji wa huduma ya matibabu bure katika Hospitali hiyo,Meja Jenerali Gabriel Mhidze amesema pamoja na huduma hiyo ya afya ambayo itatolewa kwa siku tatu kuanzia leo Agosti 29 hadi Agosti 31 mwaka huu, pia watatoa misaada katika vituo vya watoto yatima na vinavyohudumia wazee.

"Lengo kubwa la wiki ya majeshi ya Afrika Mashariki ni kuyaleta majeshi yetu karibu ili kuyaunganisha na kuyafanya kuwa karibu na Wananchi ili kufikia lengo la Afrika Mashariki na kuondoa fikra tofauti zilizopo".Alisema Meja Jenerali Mhidze

Naye mstahiki meya wa manispaa ya Temeke Mhe. Abdallah Mtinika ameushukuru uongozi wa Jeshi hilo kwa kuichagua hospitali ya Mbagala Rangitatu kuleta misaada hiyo, pamoja na huduma za afya ambapo ametoa wito kwa Wananchi kujitokeza kwa wingi katika siku hizo za matibabu bila malipo.

Mkazi wa Mbagala Bi.Sofia Kilango amemshukuru mheshimiwa Rais Samia Suluhu Hassan kwa kuendelea kuboresha huduma za afya hasa za wakina Mama na Watoto.

Septemba 01,2022 Tanzania itaadhimisha siku ya majeshi, ikiwa ni miaka 58 toka kuanzishwa kwa JWTZ mwaka 1964.Kuelekea siku hiyo, madaktari wa jeshi hilo wanatoa huduma za kibingwa katika vituo mbalimbali vya afya Nchini sambamba na kutoa misaada ya vifaa tiba na madawa katika vituo vya Afya pamoja na misaada ya kijamii katika vituo vya kulelea watoto yatima na makao ya wazee wasiojiweza.