MANISPAA YA TEMEKE YAPATA HATI SAFI MIAKA MITATU MFULULIZO

Posted on: July 2nd, 2024

Na: Joanita Joseph - TMC Habari

Mkuu wa Mkoa wa Dar es Salaam Mhe. Albert Chalamila leo Julai 02, 2023 ameipongeza Halmashauri ya Manispaa ya Temeke kwa kupata hati safi kutoka Ofisi ya Mdhibiti na Mkaguzi Mkuu wa Serikali (CAG) kwa miaka mitatu mfululizo kuanzia 2019/2020, 2021/2022 na 2022/2023.

Mhe. Chalamila ametoa pongezi hizo katika Mkutano Maalum wa Baraza la Madiwani uliobeba agenda kuu ya kujadili taarifa ya Mdhibiti na Mkaguzi Mkuu wa hesabu za Serikali uliofanyika katika Ukumbi wa Iddy Nyundo Manispaa ya Temeke.

"Ninawapongeza sana na mnapaswa kuilinda hii hati safi, safari ya kutoka hoja 37 na 28 zimefungwa hii ni safari, hongereni, ushauri wangu jitahidini kuwekeza kwenye maeneo yenye hoja nyingi na hakikisheni mnafunga hoja zote zilizoko ndani ya uwezo wenu ili mambo yaweze kwenda vizuri. Kumbukeni Mkaguzi wa Ndani ni jicho la Serikali."

Mhe. Chalamila ametoa pongezi pia kwa Manispaa katika ukusanyaji wa mapato.

"Nimepata taarifa zenu kuwa mmeshakusanya Bilioni 47 sawa na 99% ya lengo la makusanyo kwa mwaka 2023/2024 katika hili nawapongeza sana, na niwaambie Watanzania tusivishe kodi gwanda la kisiasa, kodi inapaswa kuanza kufundishwa kwa watoto wadogo. Ili Nchi iendelee lazima ikusanye kwa watu wake" alisema Mhe. Chalamila

Kwa upande wake Dkt. Toba Nguvila, Katibu Tawala Mkoa wa Dar es salaam ametoa wito kwa viongozi na watendaji wa halmashauri kufuata sheria, taratibu na kanuni hasa katika fedha, manunuzi ya umma na nidhamu katika utekelezaji wa miradi ya maendeleo.

Akifunga Baraza hilo Mstahiki Meya wa Manispaa ya Temeke Mhe. Abdallah Mtinika ametoa shukrani kwa Ofisi ya CAG na Mkuu wa Mkoa huku akiahidi kuwa Manispaa itafanyia kazi mambo yote yaliyosisitizwa katika taarifa ya matokeo ya ukaguzi.