MAPENDEKEZO YA KUGAWA MIPAKA YA KIUTENDAJI TEMEKE SI YA KISIASA-MEYA MTINIKA

Posted on: January 10th, 2024

Na:Shalua Mpanda

Mstahiki meya wa manispaa ya Temeke Abdallah Mtinika amesema mchakato wa mapendekezo ya kugawa mipaka ya kiutendaji katika Wilaya hiyo yasichukuliwe kama ni mtaji wa kisiasa bali ni kusogeza huduma katika Jamii.

Ameyasema hayo leo Januari 10,2024 wakati wa kikao cha baraza la madiwani kilichokaa kujadili mapendekezo hayo katika ukumbi wa Idd Nyundo.

Mstahiki meya Mtinika amesema hata wao wanaopendekeza mpango huo hawana uhakika wa kuwepo kwenye nafasi hizo kwa miaka yote lakini wanafanya hivyo kwa manufaa ya wananchi wa Temeke.

"Tukichukulia mfano Jimbo la Mbagala pekee lina wakazi zaidi ya laki tisa,lakini pesa za Jimbo zinazoletwa ni sawa na zinazopelekwa kwenye jimbo lenye wakazi laki mbili".Alisema Mhe.Mtinika

Amesema watu wanapaswa kutambua kuwa haya ni mapendekezo tu na wao kama Manispaa wana haki na wajibu kupendekeza chochote ambacho wanaona kina maslahi kwa Wananchi na kupeleka mapendekezo hayo ngazi za juu kuyapitisha.

Kwa upande wake Diwani wa kata ya Mtongani Mhe.Amina Batash amesema anaamini mchakato huo utakapalokamilika utasaidia kusogeza huduma kwa Jamii kwa ukaribu zaidi.

Kabla ya kikao cha leo,mapema wiki hii kulifanyika kikao cha Kamati ya Ushauri ya Wilaya(DCC) ambapo wajumbe waliunga mkono mkono hoja ya mapendekezo hayo ya kugawa maeneo hayo ikiwemo Jimbo la Mbagala na Chamazi pamoja na baadhi ya kata na mitaa ndani ya wilaya Temeke.