MENEJIMENTI TEMEKE YAHITIMISHA ZIARA UKAGUZI WA MIRADI ROBO YA KWANZA

Posted on: October 17th, 2023

Na: Joanita Joseph 

TMC Habari.

Menejimenti pamoja na wataalamu kutoka Idara mbalimbali za Halmashauri ya Manispaa ya Temeke leo Oktoba 17, 2023 imeendelea na ziara ya ukaguzi wa miradi ya maendeleo inayotekelezwa katika Manispaa hii.

Ziara hiyo yenye lengo la kuona utekelezaji, thamani ya fedha, kubaini changamoto pamoja na kutoa utatuzi imehitimishwa leo ambapo miradi iliyotembelewa ni pamoja na ujenzi wa shule mpya ya Msingi katika eneo la Mkondogwa kata ya Chamazi (Msufini), uliofadhiliwa na serikali kuu kupitia TAMISEMI chini ya Mradi wa BOOST katika Mwaka wa fedha 2022/2023 wenye thamani ya Tshs. Milioni 475.3.

Vilevile Menejimenti ilitembelea mradi wa ujenzi wa shule mpya ya msingi Mikwambe, mchepuo wa Kiingereza iliyopo kata ya Toangoma unaotekelezwa kwa fedha kutoka serikali kuu wenye thamani ya Tshs Milioni 800, ujenzi wa Shule mpya ya sekondari kata ya Chamazi (Imani) wenye thamani ya Tshs Milioni 751.6 unaotekelezwa kwa mapato ya ndani na fedha kutoka mradi wa SEQUIP.

Halkadhalika Menejimenti imetembelea mradi wa ujenzi wa ghorofa zenye vyumba 32 vya madarasa katika shule ya sekondari Dovya, unaotekelezwa kwa fedha kutoka mapato ya ndani ya Halmashauri pamoja na Serikali Kuu ambapo kukamilika kwake kutasaidia kuondoa msongamano wa wanafunzi madarasani na hivyo kurahisisha mchakato wa ufundishaji na ujifunzaji lakini pia kupunguza umbali kwa Wanafunzi kufuata Shule nje ya kata yao na hatimaye kuwapunguzia wazazi gharama za usafiri.

Menejimenti imehitimisha ziara yake kwa kutembelea mradi wa ujenzi wa kituo cha afya Mkondogwa unaotekelezwa kwa mapato ya ndani, ambapo imepongeza ubora na kusisitiza watendaji wote kufanya kazi kwa weledi katika utekelezaji wa miradi hiyo.