Meya Awataka Madiwani Kushirikiana na Watendaji.

Posted on: October 1st, 2019

Mstahiki Meya wa Manispaa ya Temeke Mheshimiwa Abdallah Chaurembo amewataka waheshimiwa madiwani kushirikiana na watendaji wa kata ili waweze kuwa na umoja katika kusimamia miradi ya maendeleo kwenye maeneo yao.

Mhe Chaurembo ametoa maelekezo hayo  leo Oktoba mosi wakati akiahirisha kikao cha baraza la madiwani lililofanyika katika ukumbi wa Manispaa ambapo amewaelekeza Wahe. Madiwani kushirikiana na watendaji ili kuhakikisha kwamba hawafanyi mambo yatawasababisha kuingia katika mikono ya sheria.

'' Wenzetu hawawamekuwa na wimbi la kuitwa TAKUKURU sana,basi tushirikiane nao kuhakikisha kwamba hawakumbani na mambo haya yanayosababisha waitwe Takukuru,''Alisisitiza Mhe. Chaurembo.

Aidha Mhe. Chaurembo amewataka watendaji wa kata kuwa na misimamo, na sio wawe watu wa kupokea tu maelekezo ,hata kama sio sahihi,kwa sababu  yametolewa na Diwani au Meya ,ndio wayafanyie kazi,bali wanapaswa kusimamia kile ambacho kwa mujibu wa sheria na taratibu ni sahihi.

''Na ninyi mtekeleze wajibu wenu,kwa sababu ninyi ndio 'accounting officers'Ninyi ndio mnatakiwa kujibu  kuhusiana na mambo yote ya kiutendendaji kwenye kata zenu.Nyie ndio wenye ofisi.Chapeni kazi,''Alisisitiza Mhe. Chaurembo.

Kikao cha baraza la madiwani kimeahirishwa  leo ,majira ya saa nane mchana, ikiwa ni siku ya pili.Katika kikao hicho, ajenda nane zimejadiliwa,ikiwemo Maswali ya papo kwa papo, kupokea miktasari ya taarifa za kamati za kudumu za halmashauri,taarifa ya mashauri ya kinidhamu ,pamoja na mapendekezo ya ratiba za vikao.