MEYA MTINIKA AINGIA 'SITE' KUTATUA CHANGAMOTO ZA BARABARA CHAMAZI

Posted on: May 29th, 2024

Na:Shalua Mpanda-TMC

Mstahiki meya wa manispaa ya Temeke mheshimiwa Abdallah Mtinika leo Mei 29,2024 amefanya kikao na wenyeviti wa mitaa pamoja na wataalamu kutoka manispaa kujadili namna ya kutatua changamoto za miundombinu ya barabara katika kata ya Chamazi.

Akizungumza katika kikao hicho cha pamoja kilichofanyika Ofisi ya kata hiyo,Mhe.Mtinika amesema anatambua changamoto za barabara katika kata hiyo hivyo hawezi kukaa ofisini huku wananchi wakiendelea kutaabika.

"Mimi ni kiongozi wa wananchi,nimeamua kushuka huku chini mwenyewe nijionee na nimekuja na mtambo huu wa kuchonga barabara ikiwezekana hata leo kazi ya kurekebisha barabara hizi ianze".Alisema Mtinika

Akielezea mipango ya Halmashauri,meneja wa TARURA wilaya ya Temeke Injinia Paul Mhere amesema halmashauri imetenga kiasi cha Shilingi bilioni 4 kwa mwaka wa fedha ujao kutatua changamoto za barabara wilayani humu.

Diwani wa kata ya Chamazi Mhe.Gama amemshukuru Meya Mtinika kwa kuweza kufika katika Kata hiyo yenye wengi hapa nchini akiamini ujio huo utaleta mabadiliko makubwa katika miundombinu ya barabara zilizoharibiwa na mvua zilizonyesha hivi karibuni.