MILIONI 700.9 ZATUMIKA KUJENGA ZAHANATI MPYA TEMEKE, DC MAPUNDA AZINDUA

Posted on: January 10th, 2025

Na: Joanita Joseph, TMC Habari

Mkuu wa Wilaya ya Temeke Mhe. Sixtus Mapunda leo Januari 10, 2025 amezindua Zahanati mpya tatu katika Kata za Kurasini, Tandika na Miburani. Zahanati zilizogharimu takribani Milioni Mia Saba laki tisa na themanini ( 700,980,000) ikiwa ni fedha kutoka Serikali kuu pamoja na Mapato ya ndani ya Halmashauri.

Akizungumza wakati wa Uzinduzi DC Mapunda amesema

"Sisi kama Serikali tumekusanya mapato kutoka kwa Wananchi tukaweka katika Mfuko wa Halmashauri, kwa kifupi huu ni Mchango wa Wananchi wa Temeke na wa maeneo mengine, Haya Majengo ni la kwenu mmefanya ninyi, kwa maarifa yenu, kwa michango yenu ambayo mimi Mkuu wa Wilaya ninawapongeza sana" alisema DC Mapunda.

Nae Mganga Mkuu wa Manispaa ya Temeke Daktari. Jonas Lulandala amesema kuwa uwepo wa zahanati hizo tatu utasaidia kuimarisha utoaji huduma za kiafya katika kata hizo na maeneo ya jirani.

"Temeke tuna jumla ya Vituo 31 vya kutolea huduma za afya, hizi kata zote tatu hazikuwa na zahanati hapo awali. Kuwepo kwa Zahanati hizi kutakwenda kuimarisha huduma za Kiafya, Wananchi wanakwenda kupata huduma za Afya ya Mama na Mtoto, Kujifungua kwa wakina mama kwa njia ya kawaida sio upasuaji, Ultra Sound pamoja na Wagonjwa wa nje (OPD)" alisema Dkt. Lulandala.

Zahanati zote hizo tatu tayari zimekwisha anza kutoa huduma za kiafya kwa Wananchi ikiwa ni moja ya malengo ya Manispaa ya Temeke katika kutekeleza Azma ya Serikali ya Jamhuri ya Muungano wa Tanzania katika kuhakikisha Wananchi wote wanapata huduma bora za Afya, wanazozimudu na kwa usawa.