"Miongozo ya utendaji kazi ya kiutumishi izingatiwe na kuheshimiwa" Mhe Godwin Gondwe.

Posted on: December 24th, 2020

Mkuu wa wilaya ya Temeke Mh Godwin Gondwe leo ametembelea na kufanya mazungumzo na watumishi wa Hospitali binafsi ya Dar Group iliyoko Tazara Wilaya ya Temeke Jijini Dar es Salaam.Katika ziara hiyo alikuwa ameambatana na kamati ya ulinzi na usalama pamoja na Katibu tawala wa wilaya Bi Bupe Mwakibete na mganga mkuu wa wilaya Dkt Gwamaka Mwabulambo.

Mhe Mkuu wa wilaya amezuru katika viunga vya hospitali hiyo mnamo saa 7:00 asubuhi, lengo hasa likiwa ni kusikiliza na kutatua kero za watumishi katika hospitali hiyo kuanzia ngazi ya Utawala, madaktari, wauguzi na watumishi wengine wa kawaida.

Akiwa hospitalini hapo amepata wasaa wa kuzungumza na watumishi mbalimbali akisikiliza kero zinazowakabili kiutumishi, vilevile akawakutanisha na menejimenti ya hospitali na watumishi ana kwa ana kujibu baadhi ya kero za watumishi ambazo zilielekezwa kwao.

Aidha mkuu wa wilaya baada ya kusikiliza kero hizo akatoa maagizo yafuatayo:

kwanza, Mazingiara ya utendaji kazi katika hospitali hiyo yaboreshwe, watumishi waliosimamishwa kazi ndani ya siku 3 za kazi kuanzia leo uchunguzi ufanyike na hatima yao ijulikane, taaluma za watumishi ziheshimiwe, sheria za kazi zizingatiwe, kuazishwa kwa chama cha wafanyakazi na usitishwaji wa mikataba kwa watumishi uzingatie miongozo ya kazi kiutumishi.

Vilevile Mkuu wa wilaya ameitaka menegimenti ya hospitali kuacha kuwataka madaktari kuongeza vipimo kwa wagonjwa kwa lengo la kuongeza kipato mfano unakuta mgonjwa anaumwa ugonjwa fulani lakini dakatari analazimishwa kuandika vipimo vingine vya ziada ili malipo yawe makubwa kwa wale wanatumia bima.

Sambamba na hilo Mkuu wa wilaya ameutaka uongozi wa hospitali hiyo kutoa ushirikiano kwa tume ambayo itaanza kazi rasmi tarehe 26/12/2020 ili kuchunguza mwenendo mzima wa utendaji kazi na utoaji wa huduma katika hospitali hiyo.

Mwisho, Mkurugenzi mtendaji wa Hospitali ya Dar Group Bi Restuta Kibasa amekiri mbele ya Mkuu wa wilaya malalamiko na kero za watumishi zilizotolewa na kuhaidi kujirekebisha na maagizo yote yaliyotolewa na mkuu wa wilaya yatatekelezwa mapema iwezekanavyo.