MKURUGENZI MABELYA APANIA KUIFIKISHA MBALI TMC FC

Posted on: August 17th, 2023

Na:Shalua Mpanda

Mkurugenzi wa manispaa ya Temeke ndugu Elihuruma Mabelya amekutana na viongozi na wachezaji wa timu ya soka ya Manispaa hii(TMC FC) kuwapongeza baada ya timu hiyo kutinga hatua ya robo fainali ya mashindano ya Ndondo Cup.

Akizungumza ofisini kwake leo hii Agosti 15,2023 mara baada ya timu hiyo hapo jana kupata ushindi wa magoli 3-0 dhidi ya timu ya Kauzu Fc,Mkurugenzi huyo amesema ana kila sababu ya kuhakikisha manispaa ya Temeke inakuwa na timu bora na tishio kulingana na ukubwa wa Manispaa hii.

"Kwa mara ya kwanza Manispaa hii inashiriki mashindano haya na mmefika hatua hii.Mimi kwenye maisha yangu huwa napenda kuwa wa kwanza,wakati naleta wazo hili la kushiriki Ndondo Cup kila mmoja hakuamini kama tutaweza".Alisema Mkurugenzi huyo

Amesema manispaa ya Temeke ina vipaji vingi vya michezo mbalimbali pamoja na miundombinu ya viwanja ukiwemo uwanja mkubwa wa Mkapa kwa hiyo hakuna sababu ya kushindwa kuifanya timu hiyo kuwa kubwa.

Aidha mkurugenzi Mabelya amewataka wachezaji na viongozi wa timu hiyo ya TMC FC kuwa na umoja na mshikamano miongoni mwao ili kuweza kufika fainali na hatimaye kuchukua ubingwa wa mashindano hayo.

Timu hiyo imeweza kutinga hatua ya robo fainali mara baada ya kuifunga timu ya Kauzu Fc magoli 3-1 kwa njia ya penati mara baada ya timu hizo kutoshana nguvu ndani ya dakika 90 katika mchezo uliofanyika uwanja wa Bandari Agosti 14,2023.