MKURUGENZI TEMEKE AGUSWA NA KILIO CHA MARTHA

Posted on: November 15th, 2022

Na; Nassoro Rashid  

TMC Habari

Leo Novemba 15, 2022 Mkurugenzi wa manispaa ya Temeke ambaye pia ni mwenyekiti wa kamati ya ulinzi wa mwanamke na mtoto Ndugu Elihuruma Mabelya amekutana na  Martha Mwambalila  mkazi wa Temeke pamoja na watoto wake watatu ofisini kwake ili kumshika mkono kwa kumsaidia bima ya afya na vifaa vya matibabu.

 Mkurugenzi Mabelya amesema aliguswa na sauti ya Martha iliyosikika kupitia kituo cha habari cha ITV Septemba15,2022  kwenye taarifa ya habari ya Saa 2:00 usiku, akipaza sauti ya machungu baada ya kutelekezwa na mumewe.

Martha alionekana akiomba msaada kwa Mhe. Rais pamoja na wasamalia wema kuweza kumsaidia matibabu ya watoto wake (Riward Peter) mwenye ulemavu wa mguu, (Grace Peter) mlemavu wa mkono uliotokana na kuungua pamoja na (Grecious Peter) mwenye tatizo la  nyama za pua, ambapo kwa hali ya maisha ya mama huyo hawezi kumudu matibabu yao.

"Tayari tumeshatoa fedha kumnunulia vifaa vya kumuwezesha kutembea vizuri mtoto mwenye ulemavu wa mguu, kupitia Mganga Mkuu wa wilaya tutaendelea kufuatilia kwa karibu maendeleo ya watoto wawili wanaokwenda kliniki kwa ajili ya matibabu, kwa sasa tunakamilisha taratibu za kumpatia Martha bima ya afya ya CHF ili kuhakikisha angalau wanakuwa na uhakika wa matibabu". Alisema Mkurugenzi Mabelya.

Akizungumza mara  baada ya kupokea msaada huo,Martha amemshukuru Mhe. Rais kupitia mteule wake Mkurugenzi wa Temeke kwa kumsikia kilio chake na kumpatia  msaada wa vifaa vya kutembelea vya mtoto  pamoja na bima ya Afya  itakayowezesha  matibabu yao.

Huu ni muendelezo wa viongozi wa Wilaya ya Temeke kusikia sauti za wakazi wao wenye matatizo  na kuyatatua.Ambapo mnamo  September 29,2022 mama mwenye mapacha wanne Bi Fatuma Mtopela alikabidhiwa pikipiki na Mkuu wa Wilaya ili impatie kipato kitakachomuwezesha kupata mahitaji ya watoto wake.