MKURUGENZI WA TEMEKE ATUMIA UZINDUZI WA 'DIWANI CUP' KURASINI KUELEZA MAENDELEO

Posted on: October 9th, 2022

Na:Shalua Mpanda

  TMC-Habari

Mkurugenzi wa manispaa ya Temeke ndugu Elihuruma Mabelya ametumia uzinduzi wa mashindano ya "Diwani Cup" yaliyoandaliwa na Diwani wa kata ya Kurasini mheshimiwa Arnold Peter kuzungumzia maendeleo yaliyopatikana katika uongozi wa Serikali ya Awamu ya Sita.

Mkurugenzi Mabelya ameainisha baadhi ya maendeleo yaliyopatikana katika kata hiyo ya Kurasini, ambayo ni pamoja na fedha kiasi cha shilingi milioni 100 zilizotolewa na Serikali kwa ajili ya Ujenzi wa Zahanati.

"Mheshimiwa diwani na wakazi wote wa Kurasini, niwahakikishie, Halmashauri ya manispaa ya Temeke itaendelea kuweka mkazo wa maendeleo katika nyanja zote, ni wajibu wetu kama Serikali kuhakikisha maendeleo yanafika katika kata zote 23 za Halmashauri hii".Alisisitiza Mkurugenzi Mabelya

Awali akimkaribisha Mkurugenzi,muandaaji wa mashindano hayo ambaye pia ni diwani wa kata ya Kurasini na naibu meya wa Manispaa ya Temeke,

Mhe.Arnold Peter amesema mashindano hayo ambayo ni ya awamu ya pili yamekuwa na tija kubwa kwa vijana kwa kuwatengenezea ajira kutokana na vipaji vyao.

"Niwaambieni tu,mchezaji mmoja aliyeshiriki mashindano haya mwaka jana sasa hivi yupo nchini Uturuki.Kuna watu wanakuja hapa kuangalia vipaji na hivyo kuwawezesha vijana kupata ajira".Alisema Mhe.Arnold

Mashindano hayo ambayo yameanza rasmi Oktoba 9,2022 yanashirikisha timu 16, na yanatarajiwa kuchezwa kwa mfumo wa ligi ambapo mshindi wa kwanza katika Mashindano Hayo atajinyakulia zawadi ya fedha taslimu shilingi milioni 1,ng'ombe mmoja,seti moja ya jezi na mipira.