MKUU WA MKOA WA DSM ATAKA UFANISI ZOEZI LA USAJILI WA WATOTO CHINI YA MIAKA MITANO

Posted on: November 28th, 2023

Na: Joanita Joseph - TMC Habari

Mkuu wa mkoa wa Dar es salaam Mheshimiwa Albert Chalamila amewataka viongozi ngazi ya mkoa na wilaya zote jijini humu kusimamia na kuratibu kikamilifu utekelezaji wa mpango wa usajili na utoaji vyeti kwa watoto walio na umri chini ya miaka mitano katika mkoa wa Dar es salaam unaosimamiwa na Wakala wa usajili, ufilisi na udhamini (RITA).

Ameyasema hayo leo Novemba 28, 2023 wakati akifungua mafunzo kwa viongozi wa mkoa na wilaya yanayolenga kutoa elimu na uelewa wa kina kuhusiana na mpango huo ili waweze kuratibu kwa ufanisi pindi utakapoanza kutekelezwa kwenye maeneo yao.

Mhe. Chalamila amebainisha kuwa takwimu zinaonyesha zaidi wa watoto Milioni 8.8 sawa na 60.8% jijini Dar es salaam wamesajiliwa na kupata vyeti vya kuzaliwa hiyo ni alama kuwa wakazi wa jiji hili wana uelewa juu ya umuhimu wa cheti cha kuzaliwa hivyo ni muhimu waendelee kuhamasishwa kutumia fursa hii kupata nyaraka hiyo muhimu.

"Cheti cha kuzaliwa kinasaidia sana kupata huduma za elimu, afya, ajira, mikopo na kupata nyaraka nyingine za utambulisho kama vile vitambulisho vya taifa pasi ya kusafiria na nyaraka nyingine.

"Aidha usajili wa vizazi unawezesha serikali kupata takwimu sahihi kwa ajili ya kupanga maendeleo na huduma za jamii." alisema Mhe. Chalamila

Halikadhalika amewataka viongozi kushirikiana na viongozi wa dini kutoa elimu kwa wananchi juu ya uwepo na umuhimu wa zoezi hili sambamba na kusimamia vema huduma hii isigeuzwe kuwa mradi wa kujipatia mapato kwa watu wachache.

Aidha ameishukuru Serikali ya awamu ya sita chini ya Uongozi wake Mhe. Samia Suluhu Hassan na wadau wa maendeleo ikiwemo serikali ya Canada, Shirika la umoja wa Mataifa la watoto (UNICEF) na Kampuni ya mtandao wa simu Tigo kwa kuwezesha utekelezaji wa mpango huo.

Mafunzo hayo yamefanyika katika ukumbi wa Idd Nyundo Manispaa ya Temeke na kuhudhuriwa pia na wawakilishi kutoka taasisi mbalimbali ikiwemo Uhamiaji, NIDA na UNICEF.