MKUU WA WILAYA TEMEKE ATEMBELEA WODI YA WAZAZI TEMEKE HOSPITALI

Posted on: September 21st, 2023

Na: Sweetbetter Njige-TMC Habari

Leo Septemba 21,2023 mkuu wa wilaya ya Temeke mheshimiwa Mobhare Matinyi ameungana na Mbunge wa jimbo la  Temeke Mhe.Dorothy Kilave, Viongozi wa Chama (CCM) na wadau mbalimbali wa afya kukabidhi nepi za kisasa (Diapers) kwa Wanawake waliojifungua na wanaotarajia kujifungua katika hospitali ya rufaa ya mkoa Temeke.

Akikabidhi nepi hizo Mhe. Matinyi ameeleza nia ya dhati iliyowasukuma Viongozi hao na wadau wa afya kuungana pamoja kuwapongeza na kuwafariji wazazi waliojifungua katika hospitali hiyo, alisema.

"Tumekuja kuwaona kina mama waliokwisha jifungua, tukaona tusije mkono mtupu tumeleta zawadi ya nepi za kisasa (Diapers) kwa watoto wachanga, hii iwe zawadi kwa kina mama hawa, wanafanya kazi kubwa ya kuleta maendeleo kwa Taifa kwa kuwa wao ndio msingi wa maisha.Alisema Mhe.Matinyi

Aidha Mhe. Matinyi amesema wananchi wa Temeke wanapaswa kujivunia uwepo wa wataalam wenye juhudi na utu wanaohudumia katika hospitali hiyo kwa kuthamini jitihada zao.

"Nitoe shukrani kwa Mganga mfawidhi na timu yako, hospitali yetu inahudumia Wananchi wengi sana, mnafanya kazi kubwa tunapaswa kujivunia uwepo wa wataalam wanaofanya kazi nzuri kwa moyo wa kujitolea ikiwemo kufanya masuala ya uchunguzi". Alisema Mkuu huyo wa Wilaya

Kwa upande wake Mganga mfawidhi wa hospitali hiyo Dkt. Joseph Kimaro amemshukuru mkuu wa Wilaya hii kwa jitihada zake za kufanikisha upatikanaji wa msaada huo na kumuahidi watumishi wa hospitali hiyo wataendelea kutoa huduma kwa upendo na uaminifu.

"Nikushukuru kwa jitihada ulizochukua kufanikisha upatikanaji wa msaada huu utakaowasaidia kina mama waliokwisha jifungua. Hospitali hii inahudumia Wananchi wa Temeke wanaokaribia 1,500,000 lakini inahudumia zaidi ya hao kutoka maeneo jirani, tutaendelea kuwahudumia kwa upendo ili waweze kurudi kulihudumia taifa". Alisema Dkt.Kimaro

Hospitali ya rufaa ya mkoa wa Temeke ni moja kati ya hospitali inayopokea na kuhudumia wagonjwa wengi nchini.