MSTAHIKI MEYA AGAWA MIPIRA 1000 KWA SHULE ZA MSINGI MANISPAA YA TEMEKE

Posted on: May 15th, 2024

Na: Joanita Joseph - TMC Habari

Mstahiki meya wa halmashauri ya manispaa ya Temeke Mhe. Abdallah Mtinika leo Mei 15, 2024 amegawa mipira 1000 kwa shule 25 za msingi wilayani Temeke kwa ajili ya mradi maalum wa mpira wa miguu mashuleni 'football for schools' unaofadhiliwa na shirikisho la mpira wa miguu duniani 'FIFA'.

Akizungumza wakati wa hafla ya ugawaji wa mipira hiyo iliyofanyika katika ukumbi wa DMDP wilayani Temeke. Mstahiki Meya amewataka walimu kutimiza majukumu yao kikamilifu katika kuendeleza vipaji vya watoto huku akiitaka jamii kuendelea kuwekeza kwa watoto kimichezo.

"wekezeni kwa watoto, mpira huu tuwekeze kwa watoto hawa ndio mastaa wetu wa baadae, na serikali inafanya kila juhudi kuhakikisha tunakuwa na Taifa bora" alisema mstahiki Meya.

Kwa upande wake Ndugu Elihuruma Mabelya, Mkurugenzi wa manispaa ya Temeke ameshukuru ushirikiano unaopatiwa manispaa katika maswala michezo huku akiwataka wanafunzi kuzingatia masomo pamoja na kuheshimu serikali.

"Fifa wameleta vifaa hivi vya michezo kuunga mkono juhudi zinazofanywa na serikali lakini pia juhudi tunazozifanya sisi ndani ya wilaya" alisema Mkurugenzi Mabelya.

Mradi wa 'football for schools' unalenga kuhakikisha vijana mashuleni wanapata nafasi ya kucheza mpira wakiwa na vifaa sahihi ili kutengeneza taifa bora lakini pia kupunguza idadi ya wachezaji kutoka nje.