MSTAHIKI MEYA AHIMIZA UKUSANYAJI MAPATO KATIKA HALMASHAURI.

Posted on: February 3rd, 2022

Mstahiki Meya wa Halmashauri ya Manispaa ya Temeke Mheshimiwa Abdallah Mtinika ametoa wito kwa madiwani kusimamia kwa karibu ukusanyaji wa mapato yatayopelekea kukuza shughuli za maendeleo katika manispaa ya Temeke.

Ameyasema hayo siku ya Februari Mosi, 2022 katika Baraza la Madiwani wakati wakijadili na kupokea taarifa ya utekelezaji wa robo ya pili Oktoba-Disemba 2021 lililofanyika Ukumbi wa Iddi Nyundo uliopo katika ofisi za Halmashauri.

"Manispaa ya Temeke inataka kuacha alama na kuhakikisha maendeleo yanapatikana kwa Kila mwananchi na halmashauri kwa ujumla jambo ambalo litasaidia kuwa mfano wa kuigwa kwa halmashauri nyingine". Alisema Mhe. Mtinika

Sambamba na hayo ametoa rai kwa madiwani, wakuu wa idara, mkurugenzi, mkuu wa wilaya na taasisi zengine za serikali kushirikiana vyema katika utekelezaji wa majukumu kwani ushirikiano unaleta chachu ya maendeleo bora katika wilaya ya Temeke.

"Tuendelee kusimamia ajenda yetu ya mapato hakika tusiyumbe, tusiogope tuendelee kuisimamia kwa ujasiri mkubwa japokuwa watendaji hukumbana na adha mbali mbali, lakini kama kuna mahala hapalipwi mapato basi palipwe, pia tuendelee kuwa na umoja na uwazi kuitetea Temeke yetu ili kuwa kinara kwenye mapato, utekelezaji na mahusiano". Alisisitiza Mstahiki Meya

Nae Mkurugenzi wa Manispaa ya Temeke Ndugu Elihuruma Mabelya ametoa ufafanuzi juu ya maswali na changamoto zlizootolewa na madiwani wa kata 23 wa Wilaya ya Temeke ambapo ameeleza kuwa changamoto zote zinaenda kumalizika huku akisisitiza baada ya utaratibu kufuatwa atahakikisha wananchi wanaendelea kunufaika na maendeleo hayo kwa wakati.

Wakati huo huo Ndugu Mabelya amesema kuwa Manispaa ya Temeke imekuwa kinara kwa ukusanyaji wa mapato Mkoa wa Dar es salaam huku akiendelea kusisitiza kushirikiana zaidi ili kuiletea Temeke maendeleo makubwa yanayostahili, pia wametoa pongezi kwa vijana walioshiriki kupanda mlima Kilimanjaro maarufu kama skauti ambapo amesema vijana hao wameleta sifa kuitangaza Temeke.