"MWANAMKE ANA THAMANI KUBWA KATIKA JAMII" NAIBU MEYA TEMEKE

Posted on: March 4th, 2024

Na: Shamsi Dadi - TMC Habari

Kuelekea maadhimisho ya siku ya Wanawake Duniani Machi 8,2024, Naibu Meya wa Halmashauri ya Manispaa ya Temeke Mhe. Anorld Peter ambaye pia ni Diwani wa kata ya Kurasini, leo Machi 4, 2024 ameongoza kikao kifupi cha Wanawake kilichofanyika katika Zahanati ya Kurasini kilicholenga kuhamasisha wanawake wajawazito kujitokeza kupata huduma pamoja na utoaji chanjo kwa watoto wenye umri chini ya miaka 5 punde tu zahanati hiyo itakapozinduliwa rasmi.

Akizungumza wakati wa hotuba yake, Naibu Meya ameeleza lengo na umuhimu wa kuadhimisha siku ya Wanawake Duniani.

"Tukio hili linamuheshimisha sana Mwanamke,na linatukumbusha kuhusu umuhimu wake, Mwanamke ni Mtu mwenye thamani sana katika jamii na ndio maana tunaadhimisha siku ya Wanawake Duniani." Alisema Mhe.Anorld

Halikadhalika Mhe. Arnold ametumia kikao hicho kumshukuru Mhe. Rais wa jamhuri ya Muungano wa Tanzania Dkt.Samia Suluhu Hassan kwa Miradi mbalimbali ambayo inatekelezwa katika kata ya Kurasini.

"Mheshimiwa Rais amefanya mambo mengi mazuri sana ambayo ninyi kama Wanawake muwe wa kwanza kumsemea, na mimi sina budi kuyasema, katika kata yetu hii, ujenzi wa Zahanati,nusu ya fedha imetoka Serikali Kuu" Alisema Mhe. Arnold

Katika hatua nyingine Mhe.Anorld amewakumbusha Wananchi kufanyia kazi elimu ya ukatili wa kijinsia sambamba na kujisajili kwenye vikundi ikiwa ni pamoja na kuomba mkopo kwa ajili ya kujikwamua kiuchumi.

Kwa upande wake kaimu mganga mfawidhi wa zahanati hiyo Dkt. Zakia Ngondo ametoa wito kwa wa wananchi kujitokeza kupata huduma zahanati hapo jambo litakaloleta chachu ya kupata huduma nyingine zaidi kama vile 'X-ray' na 'Utra-sound', pamoja na kutoa elimu ni kwa namna gani wazee wenye umri kuanzia miaka 60 na kuendelea wanapata huduma bure za kiafya.