NAIBU WAZIRI WS KAZI AWAJIA JUU WAWEKEZAJI WASIOFUATA SHERIA

Posted on: November 24th, 2022

Na:Shalua Mpanda

TMC Habari.

Wito umetolewa kwa wawekezaji Nchini kufuata sheria za kazi na katiba ya Nchi kwa Watumishi na kuacha kuwanyanyasa Watumishi hao kwa kuwa nia ya Serikali ni kuona Watanzania wananufaika na uwekezaji huo.

Hayo yameelezwa leo Novemba 24,2022 na naibu waziri Ofisi ya Waziri Mkuu anayeshughulikia kazi,ajira na vijana Mhe.Patrobas Katambi wakati wa ziara yake ya kukagua mazingira ya kazi katika viwanda wilayani Temeke.

Naibu Waziri huyo amesema amechoshwa na malalamiko juu ya manyanyaso,ukatili na mazingira yasiyo rafiki kwa wafanyakazi na hasa katika viwanda vinavyomilikiwa na baadhi ya wawekezaji hapa Nchini.

"Hatuwezi kuzunguka kila kiwanda Nchi Nzima kuzungumzia suala moja kila siku,nawaagiza wawekezaji wote kufuata sheria za kazi na ile sheria kuu ambayo ni Katiba".Alisema Mhe.Katambi.

Mmoja wa wafanyakazi katika kiwanda cha kutengeneza mabegi cha Matrix International (T) Ltd kilichopo kata ya Keko amemueleza Naibu Waziri huyo kuwa amefanya kazi zaidi ya miaka 10 katika kiwanda hicho bila ya kuwa na mkataba huku wengine wakilamika kuachishwa kazi bila kufuata utaratibu na kunyimwa stahiki zao.

"Yaani hapa unaingia asubuhi unafanya kazi mpaka saa 3 usiku au saa 4 na ikitokea siku umechelewa kufika asubuhi hata dakika 1 tu unakatwa elfu 1 na ukichelewa kufika kwenye kikao unakatwa elfu 5....ikitokea bahati mbaya umekanyaga "material"unakatwa elfu 50".Aliongeza mmoja wa wafanyakazi kiwandani hapo.

Pamoja na mambo mengine Mhe.Katambi ametoa muda wa siku 14 kwa wamiliki wa Kiwanda hicho kuhakikisha wanarekebisha changamoto zote zilizoelezwa na Wafanyakazi hao huku akiahidi kufuatilia maagizo hayo, mojawapo likiwa kuwapatia mikataba ya ajira Wafanyakazi hao wapatao 400.

Katika ziara hiyo ambayo naibu waziri Katambi aliambatana na katibu tawala wa wilaya ya Temeke Bi.Bupe Mwakibete ambaye alimuwakilisha Mkuu wa wilaya,pamoja na watendaji wengine kutoka NSSF,Mfuko wa Fidia kwa Wafanyakazi(WCF),Wakala wa Afya na Usalama mahali pa Kazi(OSHA) walitembelea pia kiwanda cha Herocean Industries (T) Ltd.