NAPA YATOA MAFUNZO KWA WATENDAJI WA KATA NA MITAA UTEKELEZAJI WA ANWANI ZA MAKAZI

Posted on: June 20th, 2025

Mratibu wa mkoa wa mfumo wa anwani za makazi (NAPA) bi. Upendo Charles ameongoza zoezi la mafunzo kwa Watendaji wa Kata na Mitaa (manispaa ya Temeke) kwa lengo la kukumbushana kuhusu matumizi ya mfumo, kusajili na kusasisha anwani pamoja na kuboresha taarifa ambazo awali zilipungua wakati wa usajili.

“Tumekumbushana kuhusu matumizi ya mfumo tangu mwanzo, jinsi ya kusajili barabara, makazi na kusasisha taarifa. Nendeni mkafanye kazi hii kwa weledi mkubwa, kushindwa kwenu ni kushindwa kwa wilaya yetu na mkoa wetu, mkaifanye kazi hii kwa ufanisi mkubwa”

Kwa upande wake Afisa Utumishi Mkuu wa Manispaa ya Temeke Ndg. Kassim Mfaume alisema

“Mmefundishwa mambo mengi na ya msingi, kusajili barabara,tujitahidi kwenda kufatilia mfumo vizuri, mkafanye mazoezi ya kutosha na mahali ambapo hujaelewa uliza kwenye group la wataalam ili usaidiwe. Kila mmoja kwa namna ya kipekee akafanye kazi kwa weledi. Zoezi hili si kwa ajili ya wanafunzi wanaokwenda vyuoni tu ni zoezi endelevu na mkurugenzi amepongeza muitikio wenu na anaamini mtafanya vizuri”

Ikumbukwe zoezi hili lilianza mwaka 2022 kupitia oparesheni ya mfumo wa anwani za makazi, uhakiki na sasa ni matumizi rasmi ya mfumo ambapo barua za utambulisho kwa Wanafunzi wanaoomba mikopo ya Elimu ya juu watasajiliwa kutokana na anwani zao za makazi ili kupata barua za utambulisho.