Serikali Kumaliza Tatizo la Mafuriko Dar es Salaam.

Posted on: December 2nd, 2019

Waziri wa TAMSEMI  Mhe. Selemani Jaffo ameeleza mipango inayotekelezwa na inayokusudiwa kutekelezwa na serikali katika siku za usoni kwa ajili ya  kumaliza tatizo la mafuriko ambayo yamekuwa yakitokea mara kwa mara katika jiji la Dar es Salaam.

Mhe. Jaffo ameeleza mipango hiyo mwishoni mwa wiki baada ya kukagua ujenzi wa mfereji katika mtaa wa Kijichi wakati wa ziara yake ya kukagua miradi ya ujenzi inayotekelezwa na serikali katika manispaa ya Temeke  kupitia Mradi wa Uboreshaji Miundombinu Jiji la Dar es Salaam (DMDP).

Akitoa ufafanuzi wakati wa mahojiano na waandishi wa habari  Mhe. Jaffo amesema kwamba kupitia DMDP takribani Kilometa 40 za mifereji mikubwa na kilomita 30 za mifereji midogo imeshajengwa, na kwamba kwa kiwango kikubwa mradi huo utaweza kuondoa changamoto ya mafuriko katika maeneo mbalimbali.

''Kupitia mradi wa DMDP tumeamua kuboresha baadhi ya mito; mto Sinza,mto Cha'gombe ,hali kadhalika na mifereji,kwa mfano mfereji huu wa Kijichi, Lengo letu kubwa ni kuwa maji yote ya mvua ambayo huwa yanatapakaa  mitaani yaweze kwenda katika chaneli husika na kuweza kufika katika ukanda wa bahari kwa ajili ya kwenda kuingia baharini.

Sasa hivi tunaendelea na juhudi katika eneo la bonde la msimbazi, kuhakikisha kwamba tunaliimarisha bonde la mto msimbazi,lengo kubwa ni kwamba hatutaki kuona maji yanatapakaa katika jiji la Dar es Salaam .Imani yangu ni kuwa kazi hii ya awamu ya kwanza ambayo ni ujenzi wa mifereji imekamilika,na inaendelea kukamilika, katika baadhi ya maeneo lakini tutakapokuja kuanza 'package' namba 2 ,ile ambayo kazi yake kubwa ni kuhakikisha kwamba bonde la Msimbazi tunaliimarisha vizuri,naamini kwamba jiji la Dar es Salaam litakuwa ni jiji rafiki kuliko jiji lingine lolote hasa katika suala zima ya usambaaji wa maji kwenye mitaa''. Alisisitiza Mhe. Jaffo.

Katika hatua nyingine Mhe. Jaffo amezungumzia suala la maji taka ambapo amesema kwamba  mpango wao mkubwa kwa kushirikiana  na wizara ya maji kupitia DAWASCO kupitia ni kuhakikisha kwamba  maji taka yanasafirishwa katika utaratibu mzuri. Na kwamba Sasa hivi wako kwenye 30% ,lakini mipango yao ya baadae ni kufika 75%. Ambapo  kupitia mpango mkakati wao  muda mrefu wataakikisha kwamba jiji la  Dar es Salaam  linakuwa jiji rafiki kwa watu kuishi.

Jiji la Dar es Salaam limekuwa likikabiliwa na changamoto ya mafuriko hususani wakati wa mvua nyingi. Hata hivyo serikali imekuwa ikifanya jitihada mbalimbali kukabiliana na mafurikio hayo kwa kuendelea kujenga na kuboresha miundondombinu ya kupitisha maji .