"SISI NA UGANDA NI NDUGU" MHE.MEYA MTINIKA

Posted on: March 17th, 2023

Na:Shalua Mpanda-TMC Habari.

Mstahiki meya wa manispaa ya Temeke mheshimiwa Abdallah Mtinika leo Machi 17,2023 amepokea ugeni wa wabunge na watendaji wengine kutoka Bunge la Uganda waliofika kujifunza mambo mbalimbali yanayofanywa na Manispaa hii.

Akizungumza na wabunge hao ofisini kwake,Mhe.Mtinika amesema kuwa wananchi wa Nchi hizi mbili wamekuwa ni ndugu kutokana na muingiliano wa kijiografia uliopo baina ya Nchi hizi.

"Tunawakaribisha mje Tanzania kuwekeza kwani tuna mazingira mazuri ya uwekezaji, pia sisi tumekuwa kama ndugu hata ukiangalia wakazi wengi wa mipaka iliyo karibu na Uganda kama Bukoba wana shabihiana na wenyeji wa Uganda".Alisema Meya Mtinika .

Naye mbunge wa Bunge la Uganda na mwenyekiti wa kamati ya Bunge Utumishi wa Umma na Serikali za Mitaa Mhe. Onzima Godfrey amesema amejifunza mambo mengi kupitia ziara hii ikiwemo mikopo isiyo na riba(ya asilimia 10) ambapo ameeleza kuwa tofauti kubwa katika utoaji huu wa mikopo ni kwamba nchini Uganda riba imekuwa kubwa ukilinganisha na Tanzania ambapo mikopo hii haina riba.

Ziara hiyo iliwezesha Wabunge hao kutembelea vikundi vilivyonufaika na mikopo hiyo ambapo walitembelea Jukwaa la Wanawake Miburani waliopewa mkopo wa gari ya kukusanya takataka na kikundi cha Taifa Kwanza kinachojishughulisha na uuzwaji wa bajaji na pikipiki.