Tahadhari ya Homa ya Dengu yatolewa.

Posted on: April 15th, 2019

Dengue ni ugonjwa unaosababishwa na virusi viitwavyo Dengue vinavyosambazwa na mbu aina ya Aedes . Mbu huyu anayeambukiza homa ya dengue hupendelea kuishi karibu na makazi ya watu na huweza kuuma binadamu mchana na usiku. Ugonjwa huu huathiri sana nchi za tropiko kama Amerika ya kusini na Africa. Ni moja kati ya homa kali inayodhoofisha na kuambatana na maumivu makali. Kwa sasa, hakuna kinga ya homa ya dengue, njia pekee ya kuepuka ugonjwa huu ni kuzuia kuumwa na mbu anayesambaza homa ya dengue.

Kutokana na uwepo wa viashiria vya ugonjwa wa homa ya dengue, Halmashauri ya Manispaa ya Temeke kupitia Idara ya Afya imechukua tahadhari kwa wakazi wake kwa kutoa elimu juu ya homa ya hiyo hususani kipindi hiki cha mvua na kuwataka wakazi kuhakikisha wanazingatia maelekezo yote yanayotolewa katika vyombo vya habari ili kupata uelewa zaidi.

Nae Mganga Mkuu wa Manispaa ya Temeke Dr.Gwamaka Mwabulambo alisema watu wanatakiwa kuchukua tahadhari ya homa ya dengue, na kubainisha kuwa dalili zake ni za wazi hivyo kuwataka wananchi kujikinga ili wasipate vimelea hatari vya homa vya dengue.

“Ugonjwa wa dengue ni hatari lakini bado tunaweza kujikinga na madhara yatokanayo na kuumwa na mbu huyo, na hatua madhubuti ni kuhakikisha  mavazi yanayovaliwa yanafunika miguu na mikono hususani nyakati za jioni na kuhakikisha mazalia ya mbu yanateketezwa ili kuondoa uwezekano wa kuzaliana zaidi”.Alisema Dr Gwamaka.

Alibainisha zaidi kuwa dalili za awali za ugonjwa huo ni pamoja na Maumivu makali ya kichwa macho kuuma, maumivu ya viungo, Kichefuchefu, kutapika, vipele ambavyo hutokea siku nne baada ya homa kuanza, kutoka damu puani, kwenye fizi na kuchubuka kirahisi.

Nae Bibi Prisca Uswege mratibu ufatiliaji wa magonjwa wa Manispaa ya Temeke alibainisha kwamba elimu inatolewa katika kata zote ili kuhakikisha mazalia ya mbu yanaharibiwa na alibainisha zaidi kwamba zoezi hili litakuwa endelevu kwa Manispaa yetu.

“Tunaweza kupambana na mbu hawa wa magonjwa endapo tutaamua kuhakikisha mazingira yanakuwa safi kwa kuondoa vichaka na kufukia madimbwi”, Alisema Bibi Prisca.

Sambamba na hilo kupitia kikao cha Mganga Mkuu wa Mkoa, kamati ya ufuatiliaji na udhibiti wa magonjwa ya mlipuko ilikuja na maazimio yafuatayo, kwanza kwa kuongeza nguvu zaidi kuangamiza viluilui, kushauri taasisi na maeneo yenye mikusanyiko ya watu kupulizwa dawa kuua mbu hawa, kutoa taarifa kwa waganga wafawidhi wa vituo ili wajiandae kama itatokea kupokea mgonjwa wa aina hiyo pamoja na  kupitia taaarifa za kila wiki za mfumo wa taarifa (eIDSR reports) ili kubaini vituo vyenye ongezeko lisilokuwa la kawaida la wagonjwa waliopimwa malaria, lakini hawakuonekana na vimelea vya malaria.

Ikumbukwe kuwa mara nyingi dalili za ugonjwa huu huwa sio kali na wengi hudhania ni homa ya mafua au maambikizi mengine ya virusi. Dalili hizi huanza kutokea baada ya wiki mbili, lakini kwa wengi huchukua wiki moja ya kwanza na tayari utaanza kuona dalili za dengue.hivyo basi ni vema kuwahi kituo cha afya kwaajili ya vipimo na kubaini tatizo husika.