Tamasha la Vicoba Queens

Posted on: March 1st, 2020

VICOBA QUEENS YAFANYA TAMASHA LA AINA YAKE

Tamasha hilo lililobeba ujumbe  wa NGUVU  YA VIKOBA, WEKEZA, INUKA NA VICOBA  lilifanyika jumamosi katika ukumbi wa PR Stadium Hotel  Wilaya ya Temeke Jijini Dar es Salaam.

Tamasha hilo lilipambwa na maonesho ya bidhaa za wanawake wajasiliamali, shuhuda za wanawake waliofanikiwa kupitia VICOBA na mafunzo mbalimbali yenye kuwawezesha wanachama kuwa na ufahamu wa kuwekeza na VICOBA.

Katika picha ni baadhi ya wanawake wajasiriamali wakiwa na bidhaa zao  katika tamasha la Vicoba Queen.

Akiongea katika tamasha hilo mgeni rasmi Katibu mkuu Baraza la uwekezaji Bi Beng`i  Issa amewapongeza Vicoba Queens kwa kuandaa tamasha hilo na amewataka kuhakikisha kila mwanachama anapochukua mkopo katika Vicoba awekeze katika biashara ya kuzalisha ili kuepuka kushindwa kurejesha mkopo.

Mgeni rasmi Bi Beng`i Issa akifungua tamasha la Vicoba Queens katika ukumbi wa PR hall.

Pia ameridhishwa na namna Vikoba Queens walivyoweka mfumo mzuri wa kukopeshana, lakini pia mifumo ya pesa ya uwazi uwepo wa wahasibu na wakaguzi wa ndani na hadi sasa hakuna malalamiko yoyote yale hivyo nawapongeza sana.

Aidha katika kuonyesha kikundi hicho kimeimarika  Bi Zena Ponela mwanachama wa kikundi hicho ambaye kwa sasa anafanya biashara zake Mkoani Mtwara alitoa ushuhuda wake kuwa alianza kukopa milioni 6, milioni 15 na sasa ameweza kukopa milioni 30 ambazo zimemwezesha kununua gari la ubebaji maji na kuyasambaza kwa wananchi wa mtwara, hiyo  ni fursa inayompa kipato kwa kuwa mkoa huo unachangamoto ya maji baridi, maji mengi kule ni ya chumvi.

Baadhi ya wanachama wa Vicoba Queens wakiwa katika picha ya pamoja na mgeni rasmi Bi Beng`i Issa.

Kwa upande wa Mwenyekiti wa Vicoba Queens Bi Diana Mfumbulwa alisema wameona wafanye Tamasha hilo ili kuuonyesha umma nguvu ya Vicoba na kuwahamassha wananchi kuwekeza na vikoba ili waweze kujikwamua na wimbi la umasikini, ukiwekeza katika Vicoba unakopeshwa kwa urahisi tena kwa riba ndogo na katika Vicoba vyetu kila kitu kinafanyika kwa uwazi na kwa wakati.

Mwisho Vicoba Queens wameunga mkono juhudi zinazofanywa na Mkurugengzi wa Manispaa ya Temeke Ndg Lusubilo Mwakabibi za ujenzi wa vyumba vya madarasa na Ununuzi wa madawati kwa kuchangia Tsh 100,000/=.