Tathimini ya Utoaji Chanjo Wilaya ya Temeke

Posted on: October 23rd, 2019

TEMEKE YAVUKA LENGO UTOAJI WA CHANJO YA SURUA, RUBELLA NA POLIO.

Halmshauri ya Manispaa ya Temeke imevuka lengo katika utoaji wa chanjo ya Surua,Rubella na Polio kwa kufanikiwa kutoa chanjo kwa watoto wapatao 216,658 kati ya 190,164 sawa na 114% na chanjo ya Polio watoto 126,528 kati ya 112,870 sawa  na 112%  zoezi ambalo ni la kitaifa likisimamiwa na Wizara ya Afya na Maendeleo ya Jamii, Jinsia, Wazee na Watoto kwa kushirikiana na wadau anui wa Afya lilianza tarehe 17/10/2019 na kuhitimishwa 21/10/2019.

Akitoa taarifa juu ya utekelezaji wa zoezi hilo kwa wajumbe wa kamati ya afya ya msingi katika ukumbi wa Mkuu wa Wilaya ya Temeke mratibu wa Chanjo Wilaya ya Temeke kwa niaba ya Mganga Mkuu wa Wilaya Ndg Jumanne Kagoda akasema kutokana na malengo tuliojiwekea katika zoezi hilo tumefanya vizuri zaidi ya asilimia 100 ameeleza hayo mbele ya wajumbe na kusema licha ya kuwa zoezi hili kitaifa limeisha mda wake bado katika wilaya ya Temeke chanjo ya polio Surua na Rubella itaendelea kutolewa katika vituo vyetu vya Afya.

Pia amesema kampeni hii ilifanyika kwa utaratibu wa watoto wote wenye umri chini ya miaka 5 kupewa chanjo, sababu za kutoa chanjo hizi ni kuwa kuna uthibitisho wa kitaalamu kwamba asilimia 85 tu ya watoto wanaopata chanjo ya surua wakati wanapotimiza miezi 9 wanapata kinga kikamilifu,kuna watoto ambao hawajapata kabisa huduma ya chanjo na kuna vituo ambavyo havijafikia lengo la kuwachanja watoto kwa 100% na mlundikano wa watoto hawa wasio na kinga kila baada ya miaka 3 hadi 4 huweza kusababisha milipuko ya Surua.

Tafiti zilizofanyika nchini zinaonyesha kuwa ugonjwa wa Rubella upo na umeathiri watoto wengi wanaozaliwa na pia unaleta madhara ya kudumu kwa watoto hawa.

Aidha lengo mahususi la kampeni hii ya Kitaifa ni kuzuia na kupambana na magonjwa yanayozuilika kwa kutoa chanjo kwa watoto wote wenye umri chini ya miaka 5, kampeni imelenga kuongeza kinga kwa watoto wote kwa kuwapatia chanjo hata kama walishapata chanjo katika utaratibu wa kawaida na magonjwa yaliyolengwa kwenye kampeni hii ni Surua, Rubella na Polio.

Kwa upande wa Mwenyekiti wa kamati hiyo ambaye ni mkuu wa Wilaya ya Temeke Mh Felix Lyaniva amewashukuru wananchi na wetendaji katika ngazi zote kwa kutekeleza zoezi hilo la Kitaifa  kwa ufasaha na kupelekea kuvuka lengo hivyo akahimiza kuendelea kutimiza wajibu wa kamati ya afya ya msingi ya Wilaya kwa kuhamasisha, kutoa taarifa sahihi, kuelimisha jamii na kuhabarisha Umma.