TEMEKE YAADHIMISHA SIKU YA UKIMWI DUNIANI

Posted on: November 30th, 2023

Na: Joanita Joseph - TMC Habari

Kila ifikapo Desemba Mosi,Dunia huadhimisha siku ya UKIMWI, lengo likiwa ni kuikumbusha Jamii kuhusu ugonjwa huu, kutafakari hatua zilizopigwa katika kukabiliana nao, kukumbuka na kuenzi mamilioni ya watu waliopoteza maisha kutokana na ugonjwa huu, lakini pia kutoa elimu na kuweka mikakati ya pamoja katika kudhibiti na kutokomeza VVU/UKIMWI.

Kuelekea kilele cha maadhimisho hayo leo Novemba 30, 2023,Temeke imeadhimisha siku ya UKIMWI Kiwilaya yaliyofanyika katika viwanja vya Zakhiem - Mbagala na kuhudhuriwa na Viongozi, Taasisi pamoja na Asasi mbalimbali.

Akizungumza wakati wa hotuba yake, Mkuu wa wilaya ya Temeke Mhe. Sixtus Mapunda ambaye pia alikuwa mgeni rasmi, ametoa wito kwa vikundi Elimisha Rika, kuendelea kuelimisha jamii hasa kundi la vijana, kwakuwa maambukizi yanazidi kuongeza kasi kwa kundi hilo.

DC Mapunda ameonesha kuchukizwa na shughuli za mtaani almaarufu kama 'vigodoro', sababu zimekuwa chanzo cha kuleta maambukizi mapya ya virusi vya UKIMWI,ambapo amewataka viongozi katika serikali za Mitaa kudhibiti shughuli hizo.

"Tunatambua uhuru wa watu kufurahi, lakini furaha za kutuangamiza hazitufai, popote wanapofanya haya mambo wachukuliwe hatua za kisheria" alisema Mhe. Mapunda

Halkadhalika amekemea unyanyapaa kwa waathirika wa virusi vya UKIMWI, badala yake jamii iendelee kuwapenda, kushirikiana nao, na kuwasaidia kwa kadri inavyowezekana.

Katika hatua nyingine, Mhe. Mapunda amesema Serikali itaendelea kushirikiana na wadau katika kuhakikisha afua zote za kupambana na virusi vya UKIMWI zinapewa kipaumbele, sambamba na kutoa utaratibu wa utoaji mikopo kwa makundi ya Vijana, Wanawake na watu wenye Ulemavu.

Mwisho amepongeza na kushukuru wadau wote walioshiriki kufanikisha maadhimisho ya siku hiyo muhimu,na kuwataka wana Temeke kujiwekea utaratibu wa kupima afya katika kutokomeza UKIMWI ili kuishi kwa furaha.

Maadhimisho hayo yaliyobeba kauli mbiu ya jamii iongoze kutokomeza UKIMWI, yamewezeshwa na FHI 360, UMATI, MDH, PASADA, Untold foundation, PACT, N.K, yanatarajiwa kuadhimishwa Kimkoa kesho Desemba Mosi, 2023, katika manispaa ya Ubungo.