TEMEKE YAANZA VIZURI MASHINDANO YA SHEMISEMITA

Posted on: October 23rd, 2022

Timu ya manispaa ya Temeke imeanza vyema mashindano ya  Shirikisho la Michezo ya Serikali za Mitaa Tanzania(SHIMISEMITA)baada  ya kuichapa bila huruma timu ya halmashauri ya wilaya ya Chelinze kwa mabao 2-0, mchezo uliochezwa katika uwanja wa shule ya Sekondari Morogoro leo Oktoba 23,2022.

Mchezo huo wa kundi B ni wa kwanza kwa timu zote ulikuwa ni wa upinzani mkali  lakini mpaka kipyenga cha mwisho kinapulizwa manispaa ya Temeke ikafanikiwa kukusanya alama tatu muhimu kwa magoli yaliyofungwa na mchezaji hatari Hamisi Shedafa.

Akizungumza mara baada ya mechi hiyo mwalimu wa timu ya Temeke Abel Tweve amesema baada ya ushindi wa leo wanajipanga kwa ajili ya mechi inayofuata dhidi ya halmashauri ya wilaya ya Chunya na kuahidi ushindi ili waweze kwenda hatua inayofuata huku akibainisha mbinu aliyotumia kupata ushindi huo.

" Tulichokifanya tumeweka wachezaji wengi katikati na kumiliki mpira tukatengeneza nafasi  tunashukuru tukafunga, kwahyo safari imeshaanza na tunaendelea kuwaahidi wana Temeke kuchukua ubingwa, wajiandae kuja kutupokea na kombe letu". Alisema mwalimu Tweve

Kwa upande wake kaimu mkuu wa Kitendo cha Utamaduni, Sanaa na Michezo manispaa ya Temeke Bi. Sauda Salum amesema timu yao imekuja kushindana wala si kushiriki.

"Tunaahidi kuendeleza ushindi na kujizoelea alama muhimu zitakazotuwezesha kwenda hatua inayofuata, tumekuja kujituma na kushindana na tunaahidi tutarudisha ushindi nyumbani". Alisema Bi Sauda.

Mashindano haya ya SHIMISEMITA yanaendelea katika viwanja mbalimbali hapa  Morogoro ambapo michezo yote bado ipo kwenye hatua za makundi na timu za halmashauri za Wilaya na Manispaa zimeonesha ushindani mkubwa na  kufanya vizuri ili kuweza kuibuka mabingwa wa mashindano haya.