TEMEKE YAENDELEA KUIMARISHA UWEZESHAJI WA KIUCHUMI KWA WANAWAKE

Posted on: August 16th, 2025

Mwenyekiti wa Jukwaa la Uwezeshaji Wanawake Kiuchumi Wilaya ya Temeke Bi. Johari Mkonde kwa kushirikiana na Azania Bank na Idara ya Maendeleo ya Jamii Manispaa ya Temeke leo Agosti 16, 2025 ameongoza Semina Wezeshi kwa Wanawake Wilayani Temeke iliyolenga kuwapatia elimu ya fedha Wanawake ili waweze kujikwamua kiuchumi.

Katika Semina hiyo Wanawake wamepatiwa elimu stahiki ya Mikopo kutoka kwa Wataalamu ili waweze kuhimili changamoto zinatokana na shughuli za kiuchumi na biashara wanazodhamiria kuzianzisha baada ya kupatiwa mikopo hiyo.

Mwezeshaji kutoka Azania Bank Ndg.Kelvin Patrick amesisitiza umuhimu wa kutumia Mikopo kwa malengo huku akiweka Mkazo wa kujiwekea Akiba ya fedha Benki ili kuepukana na majanga yanayoweza kuathiri akiba hizo endapo zitahifadhiwa sehemu zisizo rasmi jambo linaloweza pelekea kumuweka Mwanamke katika hali mbaya ya kiuchumi.

Ndg. Kelvin ametumia wakati huo kuwakaribisha Wanawake na Makundi maalum wasisite kwenda Benki na Taasisi mbalimbali za kifedha ili kuweza kujifunza Masuala ya fedha kwakuwa elimu hiyo hutolewa bila malipo yoyote.

Nae Afisa Maendeleo Manispaa ya Temeke Bi. Mwanahuba Major amewaasa wanawake kutumia vizuri mikopo ya Asilimia 10 iliyotolewa na Manispaa ya Temeke kwa Kundi la Wanawake, Vijana na Watu wenye ulemavu na kuwataka kuchangamikia fursa za mikopo hiyo kwani haina Riba yoyote na Marejesho yake ni ya muda mrefu zaidi.

Semina hiyo imefanyika katika Ukumbi wa Chuo cha DUCE Wilayani Temeke.