TEMEKE YAFUNGUA MAFUNZO YA ANWANI ZA MAKAZI NA POSTIKODI KWA MADIWANI.

Posted on: March 1st, 2022

 Mstahiki Meya wa Halmashauri ya Manispaa ya Temeke ashiriki kufungua zoezi la mafunzo ya anwani za makazi na postikodi kwa madiwani lilofanyika Februari 25, 2022 katika ukumbi wa Iddi Nyundo uliopo katika ofisi za Manispaa ya Temeke.

Aidha mafunzo hayo yaliyojumuisha wabunge wa Temeke, wakuu wa idara wa manispaa na wataalamu yenye malengo ya kuwajengea uwezo na uelewa madiwani juu ya mfumo huo na kuongeza umuhimu wa nafasi zao katika kuhamasisha wananchi wa maeneo yao ili kurahisha zoezi la ukusanyaji wa taarifa za anwani za makazi na postikodi.

Kwa namna yake Mhe. Mtinika amesema anawashukuru sana wakufunzi kwa kuwajengea uelewa huku akitumia nafasi hiyo kutoa wito kwa madiwani kutumia uelewa huo kuhamasisha wananchi kushiriki katika utoaji wa taarifa zao ili kukamilika zoezi la anwani za makazi na postikodi kwa wakati.

"Nawapongeza wataalamu na madiwani kwa kuaandaa semina hii iliyolenga kutupa ujuzi juu mfumo huu utaopelekea kuleta maendeleo ya jamii na Taifa kwa ujumla". Alisema Mhe. Mtinika

Wakati huohuo Mbunge wa Temeke Mhe. Doroth Kilave ametoa wito kwa wananchi kushirikiana vyema na wataalamu watakaokuwa wanakusanya taarifa zao ili kusaidia zoezi hilo kukamilika kwa wakati na kufikia lengo linalokusudiwa.

Sambamba na hayo naye mwenyekiti wa kamati ya anwani za makazi na postikodi Temeke Bi. Veronica Igoko ameeleza kuwa mafunzo hayo yatasaidia madiwani kuwa wasimamizi bora wa zoezi hilo katika kata zao.

Ikumbukwe zoezi la anwani za makazi na postikodi nchini litakuwa lenye manufaa mengi ikiwemo kurahisisha kufanyika biashara ya mitandao, kuimarisha ulinzi na usalama, kuimarisha ukusanyaji wa mapato ya Serikali, kuongeza ajira pamoja na kurahisisha shuhuli za tafiti na upatikanaji wa Taarifa nchini.