TEMEKE YAFUNGUA RASMI WIKI YA MAZINGIRA

Posted on: June 1st, 2023

Na: Sweetbetter Njige

Kuelekea siku ya mazingira Duniani,wilaya ya Temeke imezindua wiki ya mazingira kwa kufanya usafi na kutoa elimu juu ya utunzaji wa mazingira na udhibiti wa matumizi ya mifuko ya 'Plastic' .

Uzinduzi huo umefanyika katika soko la Sterio lililopo katika kata ya Temeke ambapo umehudhuria na watu mbalimbali wakiwemo Wadau wa Mazingira,Wananchi na watumishi wa Manispaa pamoja na ofisi ya Mkuu wa Wilaya.

Akizindua maadhimisho hayo ndugu Sadath Mohamed alisema anatarajia uzinduzi wa wiki ya utunzaji wa mazingira utakua chachu kuelekea siku 05 za wiki ya mazingira kutokana na kalenda ya Umoja wa Mataifa.

Kwa upande wake kaimu mkurugenzi wa manispaa ya Temeke Bi. Janeth Barongo amewapongeza wadau wote waliojitokeza kushiriki zoezi la usafi na kuwasihi Wananchi kuungana kutunza mazingira kwa ajili ya afya na mabadiliko ya tabia nchi kwa kuacha kutumia mifuko ya plastiki.

"Tupinge utumiaji wa mifuko ya plastiki kama ilivyo maagizo ya Serikali, tushirikiane hii mifuko iweze kuondoka, tusikasirike iwapo muuzaji dukani atasema hana mfuko mdogo wa plastiki badala yake tumpongeze"

Wilaya ya Temeke inaendelea kuhimiza Wananchi kutunza mazingira kwa kuendesha kampeni mbalimbali za utunzaji wa mazingira na kwa kufanya usafi wa kila mwisho wa mwezi hususani maeneo ya wazi.