TEMEKE YATINGA ROBO FAINALI SHIMISEMITA

Posted on: October 25th, 2022

 TEMEKE YATINGA ROBO FAINALI SHIMISEMITA MOROGORO

Na; Nassoro Rashid  TMC Habari  Morogoro

Temeke imeendelea kutetema leo Oktoba 25, 2022 katika uwanja wa Jamhuri Morogoro kwa kuichapa bao 3-0 timu ya halmashauri ya wilaya ya Chunya majira ya saa 10:30 jioni katika muendelezo wa mechi za kundi B na kujinyakulia alama 3 zinazowapeleka hatua ya robo fainali baada ya kufikisha jumla ya alama 9 katika michezo yote.

Huu ni muendelezo wa mchezo wa asubuhi waliocheza dhidi ya halmashauri ya Ikungi na kuibuka na ushindi wa 3-2 ambapo baada ya matokeo ya leo wanasubiri hatua ya robo fainali watapangwa na timu ipi.

Aidha magoli yote 3 yalifungwa na  wachezaji tofauti, ambapo mfungaji wa goli la kwanza alikuwa ni  Musa Himapanda, wakati goli la pili na la tatu likifungwa na Hamisi Shedafa ambaye ameendelea kuwa tishio katika kuzitikisa nyavu kwa kufunga jumla ya magoli 4 katika michezo yote.

Naye mwalimu wa timu kocha Abel Mtweve amesema wachezaji wana  afya njema na wana ari kubwa ili kutimiza lengo la kufika fainali na kuchukua kombe.

"Timu tumeiandaa vizuri na sisi tumejiandaa kufika fainali na maandalizi tuliyoyafanya kuingia katika mashindano haya tutaendelea kuyawekea nguvu kwa  hatua inayofuata, tunapoelekea ni mechi moja ya mtoano kwahiyo tunaweka mikakati ya kujiandaa kwa kucheza mechi moja ili tuyafikie malengo yetu"

Kadhalika Mwenyekiti wa timu hiyo Ndugu Hija Kipeleka amesema mpaka sasa timu imeendelea kufanya vizuri kwa kufikisha alama za kucheza robo fainali huku akiwataka wana Temeke kuendelea kuwaunga mkono na kuwaombea dua.

"Temeke tumekuwa kivutio kikubwa sana kila halmashauri inataka kuiona Temeke, hivyo kwa msingi huo tutapambana kuendelea kufanya vizuri ili kurudi na kombe nyumbani, wachezaji bado wanayakumbuka maneno ya hamasa kutoka kwa Mstahiki Meya, Mkurugenzi pamoja na Afisa Utumishi na wanaahidi kuyafanyia kazi"

Mfululizo wa ushindi huu unaendelea kuitangaza na kuiweka Temeke katika ramani nzuri ya michezo huku ikionesha kujipatia mashabiki wengi kwa kuonesha kandanda safi na kiasi gani wamejiandaa kuwa mabingwa wa mashindano haya ya SHIMISEMITA.