TEMEKE YATOA BILIONI 4.6 VIKUNDI 185

Posted on: March 20th, 2023

Na: Sweetbetter Njige

TMC Habari

Mkuu wa mkoa wa Dar es Salaam mheshimiwa Amos Makalla amekabidhi hundi ya shilingi bilioni 4.6 kwa vikundi 185 vya mikopo ya 10% kwa makundi maalum (vijana, wanawake na wenye ulemavu) vya halmashauri ya manispaa ya Temeke.

Akizungumza wakati wa hafla hiyo iliyofanyika leo Machi 20,2023 katika viwanja vya shule ya sekondari Kibasila Mhe. Makalla ameipongeza manispaa ya Temeke kwa kuongeza upatikanaji wa mikopo kwa fedha zilizotolewa mwaka huu.

"Tangu nimekuwa mkuu wa mkoa wa Dar es salaam nimehusika kutoa hundi nyingi lakini hii ndio yenye pesa nyingi, ni fedha nyingi sana wanufaika 1146 wanaenda kunufaika na fedha hizi. Mwaka jana nilikua hapa tukatoa mikopo kwa vikundi 167 kwa bilioni 1.8 mwaka huu bilioni 4.6 inatolewa kwa vikundi 183 ni fedha ngingi hongereni sana Temeke".Alisema Mkuu huyo wa Mkoa

Aidha Mhe. Makalla amesisitiza wanufaika hao wa mikopo hiyo isiyo na riba kurejesha kwa wakati ili kuwezesha Halmashauri hiyo kuendelea kutoa mikopo zaidi kwa wengine.

Manispaa ya Temeke inaendelea kufanya vizuri kwenye utoaji wa mikopo ya 10% kwa makundi maalum kwa kuongeza fedha na kufikia vikundi vingi zaidi vinavyokidhi vigezo ili kuimarisha uchumi wa Wnaanchi,Temeke na Taifa kwa ujumla