TEMEKE YAZINDUA SIKU YA MAZINGIRA DUNIANI KWA KUPINGA MATUMIZI YA PLASTIKI

Posted on: June 6th, 2025

Na: Sweetbetter Njige -TMC Habari

Leo Juni 6,2025 manispaa ya Temeke imefanya uzinduzi wa siku ya mazingira Duniani iliyofanyika kwa kufanya zoezi la usafi katika soko la Sterio na elimu ya utunzaji wa mazingira kwa Wananchi katika viwanja vya Temeke-Sterio.

Akiongoza zoezi hilo kaimu mkurugenzi wa manispaa ya Temeke ndugu Wasiwasi Baharia amesema uongozi wa manispaa unaendelea kushirikiana na Wafanyabiashara na wadau wa mazingira kudhibiti matumizi holela ya plastiki. Alisema

“Leo ni siku muhimu kwa Wilaya yetu tunapoadhimisha siku tano za mazingira Duniani, ujumbe wetu ni mazingira yetu na Tanzania ijayo ni kudhibiti matumizi holela ya plastiki. Sisi kama sehemu ya Dunia tunashirikiana na wenzetu Wafanyabiashara na Wadau kuhakikisha mazingira yetu yanakua safi na hakuna taka zinazotokana na matumizi holela ya plastiki”

Kwa upande wake mdau wa mazingira kutoka shirikisho la Kimataifa la uhifadhi wa uasilia na utinzaji wa mazingira ndugu Remy Lema amesema

“Tunafanya kazi ya kuhakikisha bahari inaendelea kuwa salama kwa matumizi endelevu kwa kuiheshimu dhima ya mwaka huu, tunaendelea kuhamasisha jamii kupunguza matumizi holela ya plastiki kwa kuzuia uzalishaji, matumizi na utuoaji holela wa taka hizo. 71% ya taka za plastiki zinatupwa kwenye maeneo yasiyo rasmi ikiwemo baharini, kwenye mito na vyanzo vingine vya maji, jambo linaloweka mazingira yetu na viumbe hai hatarini”

Maadhimisho hayo yamehudhuriwa na wadau mbalimbali ikiwemo SMT, Tesha group, Jeshi la akiba, Nipe fagio,Temeke Jogging  Association, Kapipi na Kadhalika.