TUKO TAYARI KUHAMIA STENDI YA KIJICHI-WADAU WA USAFIRISHAJI TEMEKE

Posted on: October 13th, 2022

"Hakika kwa stendi hii tuko tayari kuhamia Kijichi hata kesho" ni kauli iliyokuwa ikisikika na kila Mdau wa Usafirishaji wa Mabasi Yaendao Mikoani aliyekuja katika Kikao cha Maazimio ya Pamoja kilichofanyika leo Oktoba 13, 2022 kwenye ukumbi uliopo katika Soko la Kimkakati la Kijichi lililopo Manispaa  ya Temeke.

Aidha kikao hicho kilichohudhuriwa na Mtendaji wa Kata, Mwenyekiti wa Mtaa na Soko la Kijichi, Wadau wa Usafirishaji na Wawakilishi wa Tiketi Mtandao kampuni ya OTTAP kikiwa na lengo la kuweka mikakati ya pamoja baina ya Mkurugenzi wa Manispaa, Mkuu wa Wilaya na Wadau hao juu ya kuhamishia Stendi katika Soko la Kijichi ifikapo Oktoba 17, 2022.

Akizungumza mara baada ya kikao hicho mtendaji wa kata ya Kijichi Bi Nyambura Kitwala amesema Serikali itaendelea kuwapa ushirikiano mkubwa katika stendi hiyo kwa kuhakikisha ulinzi na usalama unakuwepo wakati wote kwa ajili ya abiria na mali zao.

"Leo wadau mmefika katika stendi hii mmejionea jinsi mazingira yake ni safi, eneo kubwa, nimewasikia hapa mkisema mmeipenda Stendi hii, tunaendelea kuwahikikishia kuwapa ushirikiano. Na kwa wale abiria mtakao wakatia tiketi za tarehe 17 muwaambie kuwa watapandia stendi ya Kijichi". Alisema Bi Nyambura.

Naye mwenyekiti wa UWASAKUTA ambaye pia alikuwa mwenyekiti wa kikao hicho Ndugu Musa Mombo amesema Mawakala na Makarani pamoja na Wadau wengine wa Usafirishaji wako pamoja na viongozi wa Temeke, na wamekukubali kuhamia Kijichi.

"Tutawaunga mkono mwanzo mwisho, tayari Mawakala pamoja na Makarani wamepokea tamko hilo kwa dhati ya nafsi, na wote tarehe 17 watakuwa hapa, tumefurahi kupita kiasi, hakika tunatoa kongole kwa Mkuu wa Wilaya na Mkurugenzi wa Manispaa kutuhamishia hapa"

Kikao hicho cha Wadau wa Usafirishaji ni ishara ya muitikio chanya wa kundi hilo wa kuunga mkono jitihada za Viongozi wa Temeke huhakikisha kwamba  shughuli zote za usafirishaji zinazohusisha mabasi yanayokwenda nje ya Mkoa wa Dar es Salaam yanayoanzia  Temeke Sudani na Mbagala yanahamia Stendi Mpya ya Kijichi..