TUNAHITAJI USHIRIKIANO KUPAMBANA NA UHALIFU UNAOVUKA MIPAKA-KATIBU MKUU KADIO

Posted on: September 15th, 2022

Katibu mkuu wizara ya mambo ya Ndani ya Nchi ndugu Christopher Kadio,amesema nchi za Afrika hasa za ukanda wa Kusini zinahitaji ushirikiano ili kudhibiti uhalifu unaovuka mipaka.

Ametoa kauli hiyo leo Agosti 15,2022 alipokuwa akifunga michezo  maalum ya majeshi ya Polisi ya nchi za kanda ya kusini mwa Afrika(SARPCCO) katika uwanja wa Uhuru, Dar es salaam.

"Umuhimu wa mashindano haya ni mkubwa kama tunavyofahamu michezo husaidia kudumisha umoja na ushirikiano.Vyombo vyetu vya Ulinzi na Usalama vinahitaji kushirikiana ili kuweza kupambana na vitendo vya uhalifu vinavyovuka mipaka".Alisema Katibu Mkuu huyo

Amesema mpango mkakati wa nchi hizo za ukanda wa kusini mwa Afrika ni kuhakikisha wanaimarisha ulinzi katika nchi zao.

Kwa upande wake mkuu wa jeshi la polisi Nchini inspekta jenerali Camilius Wambura amesema kuwa lengo la michezo hiyo limetimia kwa kuwa lengo kubwa la mashindano hayo ni kubadilishana uzoefu na maarifa miongoni mwa majeshi hayo.

Katika mashindano hayo,Tanzania imefanikiwa kushika nafasi ya pili katika matokeo ya jumla kati ya nchi nane, ambapo Zimbabwe ndie kinara wa mashindano hayo  kwa mwaka huu.

Michezo hiyo iliyokutanisha nchi nane ilifunguliwa rasmi Agosti 9,2022 na Waziri wa Mambo ya Ndani ya Nchi Mhe.Masauni Hamad Masauni  ambapo aliwataka washiriki hao kudumisha nidhamu kwa kipindi chote cha michezo hiyo.