"TUTAHAKIKISHA ZOEZI LA ANWANI ZA MAKAZI NA POSTIKODI TUNALITENDEA HAKI NA KUKAMILISHA KWA WAKATI" MD MABELYA.

Posted on: March 4th, 2022

Mkurugenzi wa halmashauri ya manispaa ya Temeke ndugu Elihuruma Mabelya ameongoza kikao cha Madiwani na wenyeviti  wa Mitaa kilicholenga kuwahamasisha Viongozi hao kusimamia vema zoezi la ukusanyaji wa taarifa za Wananchi katika mitaa yao.

Kikao hicho kilichofanyika Machi 4,2022 katika ukumbi wa Manispaa (Iddi Nyundo), ambapo Mabelya amewataka wenyeviti wa Mitaa na Madiwani kushirikiana kwa pamoja kuunga mkono juhudi za Rais wa jamhuri ya muungano wa Tanzania mheshimiwa Samia Suluhu Hassan Katika kukamilisha kwa haraka na ufanisi zoezi hilo.

"Maelekezo ya Serikali ni kwamba zoezi hili likamilike kwa wakati, kwa hiyo sisi kama Viongozi tumeona tukae kikao ili tuwakumbushe na kuwajenga wenyeviti wa Mitaa kufanya kazi kwa bidii na kushirikiana kukamilisha zoezi hili"Alisema Mabelya

Aidha Mabelya ametoa wito kwa Viongozi hao kutenda haki katika utekelezaji wa majukumu yao ili kufanikisha zoezi hilo Kwa ufanisi.

Kwa upande wake naibu meya Mhe. Anold Peter  ametoa pongezi kwa Mkurugenzi na timu ya wataalamu wa mfumo huo kwa kupeleka zoezi hilo kwa Wananchi, jambo ambalo litasaidia kujenga uelewa wao, na kufanikisha zoezi hilo kwa wakati.

Nae mwenyekiti wa kamati ya Anuani za Makazi na Postikodi Bi Veronica Igoko ameeleza kuwa wameona vema kukaa kikao na wenyeviti wa Mitaa ili kuwajenga na kuwahamasisha wasimamie vizuri zoezi hilo kama alivyoagiza Mhe. Rais.

Zoezi la ukusanyaji taarifa za Wananchi ni jukumu la kila mmoja, hivyo ni vema kushirikiana kwa pamoja kukamilisha zoezi hilo kwani ni chachu ya maendeleo hususani kwa Jamii na Taifa kwa ujumla.