"TUTAPAMBANA NA KIPINDUPINDU KWA USAFI" MHE. AMOS MAKALLA

Posted on: March 25th, 2023

Leo Machi 25, 2023 Mkuu wa wilaya ya Temeke,Viongozi wa Chama,Watumishi wa Manispaa pamoja na watumishi wa Taasisi mbalimbali wakiongozwa na mkuu wa mkoa wa Dar es Salaam mheshimiwa Amos Makalla wamefanya usafi katika eneo la Quality center hadi Tazara.

Akizungumza mara baada ya zoezi hilo la usafi, Mhe. Makalla amewataka Wananchi kujenga tabia ya kuchukia uchafu kwa kutokutupa taka hovyo ili kujiepusha na magonjwa hususani katika kipindi hiki cha mvua.

"Tukishakua na tabia ya kutokutupa uchafu hovyo naamini kabisa muda wote jiji letu litakua safi ili kuvutia watalii, wawekezaji lakini kupambana na magonjwa ya mlipuko ikiwemo kipindupindu. Juzi Waziri wa Nchi ofisi ya Waziri mkuu Mhe. Simbachawene alikua anatoa mkakati ya kupambana na kipindupindu kitaifa, sisi Dar es Salaam tutapambana na kipindupindu kwa kuweka jiji letu safi na inawezekana" Alisisitiza Mhe.Makalla.

Aidha Mhe. Makalla ameagiza maeneo yaliyokatazwa kufanyika biashara kuheshimiwa ili kuacha Jiji safi na kuhakikisha maeneo hayo yanapambwa kwa bustani na miti. Alisema

"Watendaji wa Kata na Mitaa muendelee kusimamia maeneo yasiyoruhusiwa kufanya biashara na kwenye 'road reserve' kuwe safi muda wote ili watu wapite. Niwaombe wadau tutunze mazingira yetu, tunakuja na kitu kingine katika Safisha Pendezesha Dar es Salaam kuhakikisha tunakuwa na bustani nzuri, tutapanda miti rafiki, tuhakikishe barabara hii inakuwa kijani"

Kwa upande wake mkuu wa wilaya ya Temeke Mhe. Mwanahamisi Munkunda amempongeza mkuu wa mkoa wa Dar es Salaam kwa kuwa kiongozi bora kwenye suala la usafi, na kuwa Wanatemeke wanafanya usafi kwa hiari.

"Usafi ni 'mentality', usafi ni 'leadership' sasa watu hawalazimishwi wanafanya wenyewe kwa hiari, mpango wetu ni kuwaunga mkono viongozi wote kuanzia ngazi ya mtaa wanaounga mkono falsafa yako ya kuhakikisha kwamba Dar es Salaam linakua jiji safi na la kuvutia. Temeke ni lango la Kusini,tutaifanya iwe 'hub' ya usafi.'

Manispaa ya Temeke kupitia Viongozi wake inatoa wito kwa Wananchi wake kuhakikisha mazingira yao yanakua safi wakati wote ili kuzuia magonjwa ya mlipuko.