TUWE NA UTARATIBU WA KUPIMA AFYA-DIWANI YOMBO VITUKA

Posted on: December 12th, 2022

NA; Sweetbetter Njige

TMC Habari

Leo Novemba 12,2022 ikiwa ni siku ya kilele cha maadhimisho ya wiki ya magonjwa yasiyo ya kuambukiza ,Manispaa ya Temeke kupitia  Idara ya Afya  imeendesha zoezi la utoaji elimu juu ya magonjwa yasiyo ya kuambukiza, ushauri juu ya masuala mbalimbali ya afya na upimaji wa afya bure.Zoezi hilo limefanyika katika hospitali ya Yombo Vituka .

Akizungumza katika uzinduzi  wa utoaji huduma, mgeni rasmi ambaye pia ni diwani wa kata ya Yombo Vituka Mheshimiwa Fulgence Rwiza aliipongeza Serikali ya Awamu ya Sita kwa jitihada zake za kuwajali Wananchi kwa kuboresha huduma za afya, alisema.

"Niipongeze Serikali yetu hususani Rais Samia Suluhu Hassan kwa kuwalipia Wananchi wa Yombo huduma hii, leo huduma inatolewa bila malipo lakini Serikali yetu imelipia huduma hii kwa ajili yenu, niwaombe Wananchi wenzangu tuwe na utaratibu wa kupima afya zetu sio lazima uumwe ndio ukapime Malaria. Natamani tuelewe magonjwa yasiyo ya kuambukiza ndiyo yanayotumaliza zaidi,hizi presha, kisukari ni hatari sana, tutunze afya na tuzingatie elimu tutakayoipata hapa"

Kwa upande wake mganga mkuu wa manispaa ya Temeke Daktari Irene Haule aliwata Wananchi kuachana na mitindo mibaya ya maisha na kuzingatia lishe bora, mazoezi na upimaji wa afya mara kwa mara.

"Magonjwa yasiyo ya kuambukiza yameanza kupewa kipaumbele, tutambue magonjwa haya yamekua mzigo mkubwa kwa Serikali kwasababu matibabu yake ni ghali sana mfano Saratani, lakini tukizingatia ulaji wa lishe bora, upimaji wa afya mara kwa mara na mazoezi tutafanikiwa kupunguza magonjwa haya"

Kwa upande wao Wananchi waliojitokeza kupata huduma wameishukuru Serikali kwa kutoa huduma bure na kuwajali watu wa rika zote,aidha wamkuushukuru uongozi na watumishi wa kituo hicho cha afya kwa huduma nzuri.

Wiki ya magonjwa yasiyo ambukiza imeambatana na kauli mbiu "Boresha mtindo wa maisha, boresha afya" ambapo Wananchi waliofanikiwa kufika walipata elimu juu ya magonjwa kama saratani ya shingo ya kizazi, magonjwa ya macho, masuala ya lishe na afya ya akili.